Nmawk Manje Majan Hta Myen Hpyen Nbungli Laknak Kaba A Majaw Mung Shawa Dum Nta Hkru Hten Ai Lam Law Nga
Nmawk Manje Mare hta Myen hpyen dap nbungli, laknak kaba ni hte gap sharu bun nga ai majaw, mung shawa dum n’ta tsa lam hten hkrum taw nga sai lam dai ginra na mung shawa ni tsun ai re.
Lai wa sai May 6 ya shani kaw na htim gasat wa ai majan hta Myen hpyen dap maga na, Nmawk hte Manje mare ni hpe n tat sum hkra, Nbungli, Laknak kaba ni hpe sha machyu let gap sharu bun nga ai majaw, mung shawa dum nta law law hkra hten taw nga ai nga, shawng lam magam gun ni tsun ai re.
“Myen hpyen dap maga de na shani shana nbungli hte hkrai wa gap taw nga ai, dai majaw nta ni mung ma hkru hten ma sai, ya Nmawk kaw sha pyi n’ta latsa ram hkru hten taw sai,” nga tsun ai re.
Nmawk hte Manje mare grup yin hkan shara jahkrat nga ai Myen hpyen hpung ni hpe jasan kau lu sai rai nna, Mare kata na Hk.M.Y (437) (319) (601) dap shara ni hpe laja lana htu shadut htim gasat taw nga ai lam Dukaba Naw Bu tsun ai re.
“Manje (319) (601) maga ni de dai hpawt kaw na mung kalang bai htim gasat taw sai nga na ai, Nmawk mare de mung mani du hkra nbungli hte ding yang gap taw nga ai,” nga tsun ai re.
Lai wa sai May 13 ya shani Manje Balik dap hte hpawn laga dap shara n kau hpe zing madu kau lu nna, dai hpawt manap kaw na mung, dai shara ni hta majan laja lana matut htim gasat taw nga ai lam chye lu ai.
Majan laja lana matut ndi gap gasat taw nga ai hta, Myen hpyen dap maga na mung nbungli hte shani shagu sa gap bun nga ai hte, Manmaw myawk dap kaw na mung, laknak kaba ni dingyang gap sharu bun taw nga ai re.
Ya ten, Nmawk Myen hpyen Hk.M.Y (473) dap makau hta ni ni htep htep gap gasat hkat taw nga ai rai nna, dai dap shara hpe lu la hkra KIA hte dap hpawm maga na mung shakut taw nga ai re.
Nmawk Manje majan nhtoi 11 ya laman hta mung shawa dum nta law law hkru hten taw nga ai zawn, lahkawng maga si hkala ai lam ni mung law taw nga ai re.
