Nambyu Namhkam Mare Myen Hpyen Byuha Dap Hpe KIA Htim Gasat Zing Madu
Danai Nambyu Namhkam Myen hpyen byuha dap kaba hpe Wunpawng Mungdan Shanglawt Hpyendap KIA dap maga dai hpawt manap htim gasat zing madu la lu sai lam, shawng lam hpyen shi sawk ni kaw na chye lu ai.
May 16 ya jahpawt hkying 7 daram hta htim gasat zing madu la lu wa ai rai nna, dai dap shara hpe lai wa ai May 11 ya shani kaw na sa htim gap gasat ai hpang, lahkawng maga hpyen masa shaja hkat let yu sin hkat taw nga ai gaw, dai hpawt manap yawng zing madu kau lu sai nga, shawng lam hpyen shi sawk ni tsun shana wa ai re.
“Lai wa sai bat mi ram kaw na sa wang gap taw sai, grai wa laja lana htim gasat hkat ai hku gaw nre, laknak kaba hte gap bun gap bun re kaw na, Myen ni hprawng pru mat ai hpang dat hpawt gaw yawng jasan kau lu sai da,” nga tsun dan wa ai re.
Dai dap shra hpe htim gasat zing madu lu ai hpang, Myen hpyen dap maga dai hpawt hkying 8 ram hta Jet Fighter nbungli hte bawm lahkawng lang sa jahkrat bun wa ai lam nga ai re hpe chye lu ai.
Namhkam Myen hpyen dap shara hpe htim gasat zing madu ai hta, Myen hpyen dap maga laknak machyu pala padang dip zing madu la lu wa ai rai tim, lahkawng maga sum machyi ai lam hpe a tsawm tup hkrak n chye lu shi ai re.
Dai dap shara hta, Hk.L.Y (260) hte Hk.L.Y (297) dap jung shara jahkrat nga ai rai nna, dai dap shara ntat sum hkra Myen hpyen dap maga na Y-12, Y-8 nbungli hpan ni hte laknak kaba jahkring hkring sa jahkrat bun wa ai lam chye lu ai.
KIA Dung 14 ginra yawng hpe Myen hpyen dap maga 2017 hpyen n-gun kaba hte htu shadut htim gasat shang wa ai majaw, Nambyu Namhkam mare hte hpawn dai makau grup yin na mare masha yawng Danai mare hta sa du hprawng yen wa ai rai nga ai.
Dai hpang Myen hpyen dap kaw na dai ginra yawng hpe htim gasat zing madu kau ma nna, dai ginra yawng hpe Pat htu, Ja htu ai lam ni yawng Myen hpyen dap tek jum kau ma ai re.
Myen hpyen dap up madu taw nga ai Danai mare a sinpraw maga na Ja Maw, Pat Maw, ginra yawng ngu na daram hpe KIA dap maga n dai laman bai htim gasat zing madu taw nga ai rai nga ai.
Ya htim gasat zing madu la lu ai Nambyu Namhkam mare hpe Ja htu sha kau ma sai majaw, dai mare hta nan mare bai wa de na matu yak hkak mat sai lam, ginra masha ni tsun nga ma ai re.
