Manje Mare Hpe Sin Makawp Taw Nga Ai Myen Hpyen Shara 4 Hpe Gasat Jahten
Manje Mare Myen hpyen Balik dap hte Myen hpyen hpung ni dap jung nga ai shara 4 hpe KIA dap maga zing madu la lu wa ai lam chye lu ai.
Manje muklum kaba hpe KIA dap maga lai wa sai May shata praw 6 ya shani kawn htim gasat nga ai hta, mani May 13 ya shani dap shara 4 hpe zing madu la lu ai nga, shawng lam hpyen shi sawk ni tsun dan ai kaw na chye lu ai.
“Mani gaw Myen Hpyen La ni nga ai shara 4 hpe lu zing ai ga rai nga ai, Balik dap, Tsi Rung Wang, Pyin Kadu Shalawng, hte Kawa Hka jawng kawng dai ni re. ya lu zing ai gaw ndai laman sha kaduk ni htu shagreng rai nna, shara la da ai ni rai nga ai,” nga tsun dan ai re.
Dai shara ni hta Manje mare kaba hpe KIA htim gasat zing madu na hpyen masa shamu shamawt wa ai ten, Myen hpyen dap maga kaw na muklum makawp ai hku tau hkrau hkyen lajang shara jahkrat da ai ni re lam chye lu ai.
Manje muklum hpe KIA htim shagrawt nga ai hta, Myen hpyen dap maga Y-12 nbungli hte Jet Fihter nbungli ni hta nbungli bawn sa jahkrat bun taw nga ai zawn, Nammaw muklum kaw na laknak kaba ni hte gap bun taw nga ai re.
Ya ten, Manje muklum ka-ang hkup daram hpe KIA htim gasat da lu sai rai nna, ya zing da lu ai shara ni hpe ginra jasan ai lam ni galaw taw nga ai lam Dukaba Nawbu tsun ai re.
Matut na rai tim Manje muklum kata na Myen hpyen dap Hk.M.Y (319) hte Hk.M.Y (601) dap ni hpe KIA dap maga laja lana matut htim gasat taw nga ai re.
Dai ginra ni hta Myen hpyen dap hte KIA dap lapran majan laja lana matut gap gasat hkat taw nga nna, Myen hpyen dap maga na mung n bungli ni hte hpyen n-gun ding yang sa jahkrat taw nga ai re lam chye lu ai.
