Monyin Awng Tabye lawk na San Patrick Kahtawlik Nawku jawng kata Jahpawt Missa Hkungga nawng jau ya nga ai Wajau hpe, Mying n chye ai laknak lang masha marai lahkawng Nawku jawng kata de shang wa nna, sinat 5 lang sa gap bun kau da ai lam, Monyin hpung masha ni kaw na chye lu ai.
Daihpawt April 12 ya jahpawt hkying 6 daram hta mying n chye ai ramma la kasha lahkawng myiman magap na, nawku jawng de shang wa na sa gap bun kau da ai re nga, Monyin hpung masha langai KNG shiga dap de nda zawn tsun dan wa ai re.
“Dai hpawt hkying 6 daram hta Missa hkungga galaw nga ai Nawku jawng kata kaw la lahkawng shang wa na shang gap ai re, asak gaw hpa n tsang ra ai, lagaw magyi kaw ma, ta lahpum kaw ma, nhka kaw ma hkra ai, ya Myitkyina tsi rung de htaw sa da sai” nga tsun dan ai re.
Sinat hpai na shang wa ai yan gaw, Nawku jawng kata shang wa ai hte kalang, Nawku Jawng ka-ang kaw na lahkawng lang, Nawku tingnyang man kaw na lahkawng lang sa gap kau da ai nga matut tsun dan ai re.
Sinat sa gap ai yan gaw, Baw chyawp chyawp da na, palawng achyang hpun da let, myiman magap da ai yan rai nna, Wa Jau hpe sha madung da sa gap kau da ai rai nna, dai wuhpung ni gaw Jinghpaw hpe n ra ai ni re nga hpung masha wa ndai zawn matut tsun da ai re.
“Jinghpaw hpe nra ai ni re ga rai nga ai, tam taw nga ai gaw yawng chye chyalu rai nga ai, gadai re ngut gaw tsun n ra ai, yawng chye na re law,” nga tsun ai re.
Ya gap hkrum ai Wa Jau gaw, Hkang amyu baw sang, asak 40 ning daram re, Wa Jau Paul Hkwi Shin Awng ngu ai wa rai nna, Monyin Jau ginwang hta magam gun ai mali ning rai sai lam chye lu ai.
Wan leng lam mayan hta ya ten amyu baw sang ni a lapran sum prat dawk nna, mang hkang byin hkra galaw ai ni nga taw ai majaw, Nawku hpung magam gun ni hte htung hking maga de na lit nga ai ni yawng mung sadi ra ai aten re lam, mung masa yu maram taw ai sara langai ndai zawn tsun maram da ai re.
“Ndai ten na Wanleng lam maga de na mabyin masa lam hpe yu yang gaw, amyu sha baw sang shada lapran hta sumprat dawk ya ai ni nga ai, dai hpe KIA dap maga na mung a tsawm lit la nna, hparan kau lu ra ai zawn, Htunghking hpung ni hpe dai hpe shada a tsawm sha chye na mahku mara hkat let hparan kau lu ra ai ngu mu ai,” nga tsun a re.
Lai wa sai April praw 5 hte praw 9 ya shani hta, သျှမ်းနီဒေသ တရားစီရင်ရေးအဖွဲ့ ngu ai wuhpung ni hku na Monyin mare na Nawku hpung sara ni hpe sadi jaw ndau laika shapraw wa ai hpe mu lu ai re.
Monyin muklum kata ya na zawn sadi jaw ndau laika shapraw dat ai hpang, Nawku hpung ningbaw gap sat hkrum ai ndai shawng ning nan lang byin wa ai rai nga ai.