Sinlum Bum na hprawng yu wa ai Myen hpyen byuha mu hte hpawn, Myen hpyen la marai 26 hpe KIA dap maga jahkrung lu rim wa ai lam, nmawk ginra masha ni tsun ai re.
April praw 6 ya jahpawt jau hkying masum daram aten Sinlum Bum kaw na hprawng yu wa ai hpyen hpung ni hpe, Hka Wan Bang hte Nmawk lapran hkap shing la gasat ai hpang, lu rim ai re nga, dai ginra na mung shawa ni KNG shiga dap de tsun dan ai re.
“Sinlum de na hprawng yu wa ai Myen hpyen hpung ni hpe Hka Wan Bang mare kaw jahpawt jau hkying 3 daram hta lai yu wa ai hpe KIA dap maga mu dat sam ai, anhte mung shawa ni mung mu dat ai, dai mi mu wa ai hpang kaw na gaw gap hkat hpang wa ai gade nna yang lu rim sai nga na ai,” nga tsun ai re.
Dai sha n ga, Nmawk mare Sinlum lam de lung wa ai lam numbraw hpalap seng hta dung nga Myen hpyen la 2, Hkanan lawk na 1, Nawng Pau na 1, ကြေးနန်း lawk na 1, yawng pawng marai 26 re nga tsun dan wa ai re.
![](https://kachin.kachinnews.com/wp-content/uploads/2024/04/435130104_827381679423105_723835963691061069_n-300x289.jpg)
Ya ten Nmawk makau grup yin yawng hta, KIA dap maga shara la taw nga nna, Myen hpyen dap ni shinggan de pyi n gwi pru mat sai nga, mung shawa ni tsun ai re.
Ya ten Nmawk muklum kata Myen hpyen dap 437 ni naw nga taw ai rai nna, muklum kata de, ya ten du hkra hpa majan byin ai lam mung rai n nga shi ai re.
Nmawk hte Loi Je lapran na Myen hpyen dap ni gaw, moi prat kaw na kring mading dap jung tawn ai shara ni rai nna, dai shara ni hta, Holicopter nbungli hkring shara ni hte, pang ga gaduk kring mading shagreng da ai dap shara ni rai nga ai
Dai ginra na Myen hpyen n-gun yawng 500 daram nga na masa nga ai lam ginra masha ni tsun maram da ai re.
Ya ten dai ginra na dap shara ni yawng htim shagrawt kau ngut ai hpang, Nmawk hte Manmaw mayan ni de bai htu shadut htim gasat wa na masa nga ai lam ginra masha ni tsun maram taw nga ai rai nna, dai hpawt manap hta mung, Manmaw Hku Li hte Na Lai makau grup yin ni hta, nbungli hte bawm sa jahkrat bun wa ai rai nga ai.