Manmaw Mare Kaba Na Mung Shawa Ni Majan Byin Wa na Masa Nga ai Rai Tim Hprawng Yen Na Shara Nmu

Manmaw mare kaba hta majan kaba byin wa na masa nga ai majaw, mung mare masha nkau hprawng yen ai zawn, nkau mare kata ga gaduk n hkun htu shajin na nga taw ai ni law ai lam ginra masha ni tsun ai re.

March praw 7 ya shani kaw na Myitkyina Manmaw lam kaba ntsa na Myen hpyen dap shara ni hpe, Wunpawng mungdan Shanglawt Hpyen dap KIA hte pawng hpawm dap maga, dai shara yawng ngu na daram hpe htim gasat zing madu ngut wa ai hpang, Manmaw mare kaba de hpyen man bai gayin wa ai masa a majaw, mung mare masha ni ya na zawn hprawng yen hkyen shajin wa ai re nga, Manmaw ginra masha langai KNG de tsun dan wa ai re.

“Ya yawng gaw Manmaw de majan byin wa na re nga, hprawng na shara mung n mu, gara de hprawng yen hkawm sa wa na re mung n chye, nkau jinghku nga ai ni chyawm gaw bum de hprawng yen ai nga, ya law malawng gaw ga nhkun gaduk htu na nga taw ai ga rai nga ai.” nga tsun ai re.

Ya ten Manmaw mare kaba na mung shawa ni gaw, majan byin wa na masa nga ai rai tim, hprawng yen na shara nmu, hprawng na lam n mu ai majaw, Manmaw mare kata hta sha myit tsang let nga taw ai ni mung law law re hpe chye lu ai.

Ya na zawn hprawng lam n mu ai ginra masha ni hku na, tinang dum nta wang kata hta mai byin ai hku na ga n hkun gaduk htu let nga taw ai re.

Manmaw muklum kata Myen hpyen dap maga, Hpaji jawng, Dakkasu jawng hte laga ahkyak ai lam numbraw shara ni hta dap jung shara jahkrat nna, shim lam shagreng taw nga ai zawn, hkawm sa hkawm wa mung shawa ni hpe mung san jep ai lam ni ding yang galaw taw nga ai lam chye lu ai.

Ga nhkun gaduk htu na masha n nga ai nta ni gaw, masha shap na htu la ra taw ai rai nna, ga gaduk kaji kaba hta hkan nna, sen mi hte sen mali lapran jaw nna, htu shangun taw nga ai lam ginra masha ni tsun ai re.

Mare masha ni a lapran shiga amyu myu a majaw, Mawdaw shabrai ni manu tsaw rawt ai lam hte laga gun rai manu ni mung lani hte lani tsaw rawt taw nga ai lam matut chye lu ai.

Ya ten Manmaw muklum kaba hta, Ja seng nkau hte gunrai hpan hkum seng n kau hpe pat da ai rai nna, Asuya rung law malawng hpe mung pat da ai nga ginra masha ni tsun ai re.

Manmaw muklum hta Myen hpyen byuha dap Ts.K.Hk 21 dung ai dap shara re ai hte, Hka dap, Hkarang dap, Nbung dap yawng daju ai shara rai nna, Hpyen masa lam hta ahkyak dik mare kaba langai rai nga ai.