Namya Myen Hpyen Byuha Dap Kaw Na Makau Grup Yin Ni De Laknak Kaba Gap Shadam Bun Nga
Hpakant Lam Namya mare hta Majan byin ai lam n nga tim, Myen hpyen dap ni kaw na makau grup yin ni de laknak kaba gap shadam bun taw nga ai re.
April praw 6 ya shana hkying 9 aten daram hta mung Namya Myen hpye Byuha dap kaw na, Namya lup wa kawng maga de shana tup laknak kaba ni hte gap shadam bun wa ai re.
Kamaing hte Namya mare lapran hkawm sa ai mung mare masha ni hpe mung Myen hpyen dap hte Pyithutsit dap ni pawng hpawm nna laja lana san jep ai lam ni galaw taw nga ai lam ginra masha langai KNG shiga dap de tsun dan wa ai re.
“Majan byin ai lam gaw n nga ai, rai tim shana ting ting laknak kaba gap shadam ma ai, anhte mung shawa ni gaw hkrit ai le, ya n kau mi nga yang hprawng yen ma sai, nkau gaw naw nga ai, ngut na mung hkrun lam hkawm ai ni hpe mung grai jep taw nga ai,” nga tsun ai re.
Ya ten Namya mare kata Myen hpyen dap hte KIA dap maga hpyen masa shaja hkat taw nga nna, mare kata nga mung shawa nkau nam maling ni de hprawng yen taw nga ai lam chye lu ai.
Namya Myen hpyen byuha dap hpe KIA dap ni htim gasat zing na shiga a majaw, lai wa sai shata mi daram kaw na mare masha nkau hprawng yen ai lam ni nga taw sai re.
Myen hpyen dap maga ya na zawn majan rai nbyin shi ai rai tim, laknak kaba gap bun taw ai majaw, nta laman majan kaba byin wa sana kun? ngu ai lam hpe ginra masha ni myit tsang taw nga ai re.
