Manman majan, lai wa sai July 30 ya shani gasat poi byin ai hpang, ndai laman bai zim taw sai lam, Manmaw ginra masha ni tsun ai re.
Lai wa sai 30 ya shani Hpodewe lawk de Myen ni pru wa ai hpe KIA maga hkap shingla gasat ai majaw majan gan byin wa ai lam sha re nga, Manmaw the ni ai ginra na mung shawa langai KNG shiga de n dai zawn tsun ai re.
“ Manmaw kaw zim taw ai ten na wa ai majaw, gara masa rai sai kun? nga Myen ni kanaw le wa ai hpe KIA maga hkap gasat ai majaw, July 30 ya shani majan loi byin wa ai dai sha re da law, n dai laman gaw kaga wa mi bai byin nga gaw nna sai,” nga tsun ai re.
Manmaw Hpodewe lawk maga na Myen hpyen ni shamawt pru wa ai hpe KIA maga hkap gast ai majaw dai lani mi majan byin ai hpang, bai zim mat ai lam, shawng lam hpyen magam gun hte ni nawn ai ni tsun ai re.
Ndai laman Manmaw ginra de majan zim taw ai rai tim, lawu mung de na myen hpyen n gun jat nga ding yang re lam chye lu ai.
Lai wa sai bat mi laman Jinghpaw mung ginra kata majan byin lai mat ai shara ni gaw, KIA masat Dapba (11) Nmau Ginwang kata hta, 12 lang, Dapba (9) Hpakant ginra hta 9 lang, Dapba (3) Manmaw Ginra kata (5) lang, Dapba (8) Ga hkyeng bum maga de lahkawng lang, Dapba(7) Hkyen Bum marawn de (5) lang, yawng pawng 32 lang byin wa ai lam, KIO Shiga lawk hta tsun tawn ai re.
Ndai laman Myen hpyen maga na gaw, Waimaw, Shwegu, Uru ginra ni de hpyen n-gun matut sa taw nga ai majaw, hpyen masa shaja hkat taw ai lam chye lu ai.
