Hpakant kaw marang laja lana htu nga ai majaw, Uru hka kalang bai tung kaba wa nna, Hpakant ginra na mare kahtawng law malawng hka hpyen tsin yam kalang bai hkrum sha taw nga ai lam ginra masha ni kaw na chye lu ai.
Mana maga kaw na htu hpang wa ai marang, dai hpawt maga kaw na grau laja lana htu wa ai majaw, dai na maga de kaw na Hpakant lamu ga nyem ai lawk ni de hka bai shang taw nga sai lam Hpakant ginra masha langai KNG shiga de n dai zawn tsun dan wa ai re.
“Ngapyawtaw, Mashi Kahtawng, Myoma lawk ni kaw shang taw sai, ya Uru hka gaw n pu de hkumpup hkrai rai mat sai, n pu de lwi shang na marang n nga sai, marang htu ai hte gaw, mare de kabrat sai,” nga tsun ai re.
Ya na zawn Marang kaba shagu mare de hka shang ai gaw, Uru hka lam yawng မြေစာ hkum pup hkrai hpring mat nna, Marang hka lai na lam n nga mat ai majaw, Hpakant ginra masha ni ya na zawn hka hpyen tsin yam hkrai hkrum sha taw ra ai re lam matut tsun ai.
Ndai kalang marang laja lana htu ai majaw, ga sharut gyi nna, mung shawa dum n ta n kau gyi kaput hkrum ai lam ni mung nga ai hpe chye lu ai.
Dai zawn Mamung mare maga de mung n ta nkau marang hka hpung-taw hte n ta nkau yawng ai lam ni nga ai hpe chye lu ai.
Hpakant kaw lai wa sai shata kaw sha Hka hpyen tsin yam laja lana hkrum sha wa nna, dum n ta jasan jaseng ai lam ni a tsawm pyi rai n ngut lu shi yang ya kalang bai kaba wa ai lam mung rai nga ai.
Hpakant kaw dai ning na laman hka kaba ai (6) lang rai sai lam chye lu ai.
Ya na zawn Hpakant kaw hka hpyen hkrum sha taw ai lam gaw, Uru hka kaw Ja htu, Lung seng htu, hka shingbut kabai re ai lam ni a majaw ya na zawn byin ai re nga, ginra masha ni tsun madi madun da ai re.
