Myen Hpyendap Laknak Kaba Gap Shadam Bun Ai Majaw Mung Shawa Dum N’ta Hkra Hten
Manmaw Myen hpyen dap Hk.L.Y 47 kaw na laknak kaba gap shadam bun ai majaw, Manje muklum kata mung shawa langai hkala hkrum ai hte dum nta 4 hkra hten wa ai lam chye lu ai.
February 16 ya shana hkying 9 daram hta Manmaw Myen hpyen dap kaw na gap shadam bun ai laknak kaba si 6 Manje mare Nawku jawng wang hte laga shara ni hta wa hkrat nna, mung shawa hkra hkala ai lam hte dum nta hten ai lam ni byin wa ai nga, dai ginra na mung shawa ni KNG de ya na zawn tsun dan wa ai re.
“Manmaw Myen hpyen dap Hk.L.Y (47) kaw na gap shadam bun ai re, Nawku jawng wang kaw 2 wa hkrat ai, ngut na laga shara ni de mung wa hkrat ai, mare lawk kata wa hkrat ai majaw mung shawa dum nta hkra hten ai, dinggai langai mung shingma maga hkala hkrum ai,” nga tsun dan ai re.
Myen hpyen dap gap dat ai lak nak kaba si 6 wa hkrat ai hta, Nawku Jawng wang kaw 2, Pyin Oo Lwin lawk hta 1, Kawng Ra lawk hta 1, Mawwatty lawk hta 1, mare shingan na hkau na pa hta 1 wa hkrat ai re lam chye lu ai.
Dai laknak kaba si a majaw, Manje mare kata na dum n’ta 4 daram hta hkra hten nna, asak 60 ning daram Jan Sumlut Kai Ban hkala hkrum wa ai re.
Mare shinggan hkauna pa de wa hkrat ai laknak kaba si a majaw Nga langai si ai lam chye lu ai.
Manje mare hte deng 30 daram tsang Je Hkam mare hta Myen hpyen dap hte KIA dap lapran majan laja lana gap gasat taw nga ai re.
Lai wa sai February 9 ya shani hta mung Manmaw Myen hpyen dap kaw na Kaung Tung, Kawng Ja mare ni de laknak kaba gap shadam bun ai majaw, mung shawa si hkala ai lam nga wa ai re.
Manmaw hte Manje lapran deng 13 daram sha tsan ai rai nna, Manmaw Myen hpyen dap kaw na laknak kaba gap shadam bun ai lam ni jahkring hkring galaw nga ai re lam chye lu ai.
