Je U Namhkan Hka Mahkrai Hpe Myen Hpyendap Nbungli Bawm Hte Wa Jahten
Manje Je U mare makau grup yin hta majan byin ai lam n nga ai rai tim, Myen hpyen dap nbungli hte bawm wa jahkrat bun ai majaw, mahkrai lahkawng daw hten mat ai lam ginra masha ni kaw na chye lu ai.
Jinghpaw mung hte Sammung jarit Je U makau grup yin hta February 15 ya jahpawt jau hkying 1 hte hkying 2 lapran nbungli bawm 4 lang wa jahkrat bun ai majaw, Namhkan Hka mahkra daw hten mat nna, laga Kunkarate mahkrai langai mung hten lawm mat ai nga dai ginra na mung shawa langai KNG shiga dap de tsun dan ai re.
“Bawm mali lang ram wa jahkrat bun kau da ai, shara lahkawng kaw re, mare shingdu na Namhkan Hka mahkrai hte mare ka-ang na Conkarate mahkrai, Namhkan Hka mahkrai gaw yawng hten mat ai, Conkarate mahkrai gaw grai wa hten mat ai lam n nga tim, n ngang mat sai” nga tsun ai re.
Je U mahkrai hpe bawm wa jahkrat bun ai lam gaw, yaw shada lam nga nga hte dai mahkrai hpe jahten kau mayu ai majaw, wa jahkrat bun ai masa re lam ginra masha ni tsun maram da ai re.
Ya hten mat ai Mahkrai gaw, dai ginra na hkawm sa hkawm wa lam hta ahkyak dik mahkrai kaba rai nna, ya na zawn bawm wa jahkrat jahten kau ya ai gaw, hpyen masa n lu shamu shamawt hkra galaw ai re nga ginra masha ni tsun ai re.
Dai jahpawt Je U mare makau wa jahkrat bun kau da ai hpang, hkying 10 daram hta Mabeing mare makau hta mung kalang bai wa jahkrat bun kau da ai lam nga ai hpe chye lu ai.
Nbungli bawm wa jahkrat bun ai hta, mung shawa dum nta hkra hten ai lam ni nga ai rai tim, masha hkra hkala ai lam gaw n nga ai nga ginra masha ni matut tsun wa ai re.
Mabeing ginra hpe KIA htim gasat zing madu da ai rai nna, dai ginra hta majan zim ai shata lahkawng hkawt na wa ai hpang, Myen hpyen dap ni ya na zawn nbungli hte bai wa gap bun wa ai rai nga ai.
Ya ten dai ginra na mung mare masha ni majan byin wa na hpe myit tsang ai majaw, tinang htuk manu ai shara ni de hprawng yen hkawm taw nga ai lam chye lu ai.
Ya ten Jinghpaw Mung hte Sammung jarit Mabeing ginwang kata shara nkau hta Myen hpyen dap hte KIA PDF dap lapran hpyen masa shaja hkat taw nga nna, majan kaba bai byin wa na masa nga ai lam ginra masha ni tsun nga ma ai re
