Manje ginwang, Jehkam Myen hpyen dap kaba hpe KIA KPDF pawng hpawm dap maga dai hpawt manap jau hkying 5 daram aten kaw na, laja lana sa htim gap gasat taw nga ai lam chye lu ai.
Jehkam Myen hpyen dap kaba hpe KIA Dung 12 hte KPDF dap ni, hpyen man 4 hte laja lana htu shadut htim gasat taw nga nna, Myen hpyen dap maga na mung Jet Fighter nbungli 2 hte sa gap garum taw nga ai lam shawng lam magam gun langai KNG shiga dap de tsun dan wa ai re.
“Majan gaw tsawm ra laja taw nga ai, Myen hpyen dap maga nbungli hte mung sa htim gap gasat taw nga ai, lam ni yawng mung pat da ai, mare kata mung shawa nkau pat hkrum taw ai lam ni mung nga taw ai,” nga tsun dan ai re.
Je Hkam mare kata majan matut laja taw nga nna, Myen hpyen dap maga nbungli hte sa gap bun ai majaw, mung shawa hkra hkala ai lam ni mung nga ai re hpe chye lu ai.
Myen hpyen dap maga dai hpawt manap jau hkying 1 daram kaw na hkying 6 daram du hkra Gawng Run, Hka Jin, Mun Sin mare ni de laknak kaba ni hte gap shadam bun wa ai re.
Lai wa sai shata hta Mabeing Myen hpyen dap hpe KIA htim gasat zing madu kau ai hpang, dai shara de mung majan byin wa na masa nga ai majaw, dai ginra na mung shawa nkau dai ten kaw na tau hkrau hprawng yen ai ni mung nga sai re.
Ya Majan byin nga ai Jehkam mare gaw, Jinghpaw mung hte Sammung jarit, Manje Shwegu Mabeing lapran na mare kaba langai re lam chye lu ai.
Ya ten dai ginra hta majan laja lana matut gap gasat hkat taw nga ai nna, kata lam masa lam tup hkrak rai n chye lu shi ai re.
