Balawng Dingsa Myen Hpyendap Hpe Dung 27 ni Matut Htim Gasat

Kaihtik ginra, Balawng Dingsa Myen hpyen dap hpe KIA Dung 27 dap ni dai hpawt manap hkying 8:30 daram kaw nna htim gasat taw nga ai lam chye lu ai.

Kaihtik Myen hpyen dap hpe htim gasat zing madu kau lu ai hpang, Balawng Dingsa Myen hpyen dap hpe htim gasat taw nga ai rai nna, laknak kaba ni hte gap bun hkat taw nga ai lam, ginra masha langai KNG de tsun ai re.

“Ya mung ngoi nga ding yang re, ga she ganan ai laknak kaba hte hkrai she shakri hkat sam ai, sinat kaji nsen mung gaw na ai. Ya hte Kaihtik zing ngut ai hte ya na Balawng Dingsa de bai htim gasat wa ai ga rai nga ai.” nga tsun dan ai re.

Kaihtik Myen hpyendap kaba hpe January 28 ya shani htim gasat zing madu kau ai hpang, Balawng Dingsa Myen hpyen dap hpe bai htim gasat taw nga ai re.

Ya htim gasat taw nga ai Balawng Dingsa Myen hpyen dap gaw Kaihtik hte Loi Jawm lapran na mare kahtawng rai nna, Kaihtik a dingdung maga deng 5 hkawt tsan ai rai nna, hpyen masa hta ahkyak ai dap shara re lam chye lu ai.

↑
Exit mobile version