Putao Makat Mung mare mali hka kau hta Myen hpyen byuhamu hte mare salang ni pawng hpawm nna, mung shawa sun wang makau de du hkra ja htu sha wa taw nga ai lam ginra masha ni kaw na chye lu ai.
Mali Hka kau Makat mung mare hta 2023 shaning htum maga kaw na, Putao Myen hpyen dap Hk.L.Y (46) dap na Byuhamu hte Makat Mung mare na mare salang ni pawng nna, Back Hold jak kaba ni hte ja htu sha taw nga ai gaw, mung shawa ni a sun wang nhpang makau de du hkra htu sha taw nga ai nga, dai ginra na mung shawa langai KNG de tsun ai re.
“Dai kaw htu taw nga ai gaw Byuhamu, Makat mung mare salang hte Mungla Shidi maga de na company langai pawng na htu taw nga ai re. 2023 shaning htum maga kaw na htu hpang wa ai, ya nga yang mare masha ni a sun wang n hpan makau de du hkra htu wa taw sai, ndai hku matut htu taw ai rai yang, lanam ta hka kaba wa yang mung shawa ni na sun wang gaw, hka agre ai kaw lam mat na hku sha rai sai” nga tsun ai.
Dai Ja Htu taw nga ai lam hta Back Hold 2 hte shani shana htu taw nga nna, lanam ta rai yang mare de hka shang wa mai ai zawn Ja htu ai kaw na pru wai zaibru nlung ni hpe mare maga de mai byin ai hku na mala sumpum shajawng da ai majaw, hkalam yak wa na hte jakli hte hkawm sa ai ni na matu ding bai ding na byin wa mai ai majaw, mung shawa ni myit tsang ai lam tsun ai re.
Ya na zawn Ja htu sha taw ai hta, Byuhamu wa nan lawm taw ai re majaw, mung shawa ni hku na hpa n gwi galaw ai hte dai hku na sha yu shalai taw nga ra ai re.
Matut htu taw ai rai rai yang, lanam ta ten mare kata de hka shang wa mai ai majaw, dai shara kaw ja htu ai lam hpe tsep kawp jahkring kau ya na hpe mung shawa ni myit mada nga ai re.
Ndai lam hte seng nna, dai mare hta ja htu sha nga ai Makat Mung mare salang, Ahti Se hpe KNG maga matut mahkai san yu yang, ndai zawn tsun wa ai re.
“Masa gaw ndai hku re, lai wa sai ten ninggam gyi ai shara re Pe 700 daram gyi mat ai shara, dai shara hpe ga kaput htaw bang shangun ai, law law se burjet n hkrat wa ai majaw Byuhamu hpe garum hpyi na mare masha ni hte jawm galaw taw nga ai, ja htu ai gaw sau manu hte dai kaw jahpring na zaibru ga na matu re,” nga tsun ai re.
Putao Makat Mung mare hta nta htinggaw 60 jan hte mare masha marai 500 hkawt nga ai mare kahtawng re lam chye lu ai.
