Namhpakka Mare Bawm Jasan Lam Naw Galaw Ra Ai Majaw Mare Masha Ni Dum N’ta Rai Nwa Na Lam Tsun
Namhpakka Myen hpyen dap hpe KIA dap maga, January 24 ya shana maga htim gasat zing madu kau lu sai rai tim, hpyen yen mung shawa ni gadai mung mare buga de n htang wa ai lam rai n galaw na matu, nawku hpung kaw na ndau da ai re.
Namhpakka mare kaba hpe Wunpawng Mungdan Shanglawt Hpyendap KIA dap maga January 29 ya shani kaw na htim gasat hpang wa ai gaw, January 24 ya shana maga hkying 6 daram hta yawng zip zi htim gasat zing madu kau lu sai rai tim, dai ginra hta bawm ni rai n lu jasan kau shi ai majaw, hpyen yen mung mare masha ni gadai rai n wa shi na lam, Namhpakka buga hkalup hpung na lit nga ai sara langai KNG de ndai zawn tsun ai re.
“Makau grup yin hta bawm hkam da ai ni grai naw nga ai, KIA dap maga de na dai ni hpe naw seng ra ai nga tsun ai, ngut na mare masha ni hpe mung pru shang ai lam tsep kawp rai n galaw shi na lam tsun da ai, dai majaw mare masha ni hku na mung seng ang ai KIA dap maga de na mai shang sai lam shang wa marit sha n nga ding sa tinang koi yen nga ai shara hta matut nga na lam tsun mayu ai, ngut na mare dum n’ta grai hten mat sai, nkau nga yang dum nta la nmai mat hkra hten mat sai dai majaw yawng naw jawm garum pawn ba la marit,” nga tsun ai re.
Ya ten Namhpakka mung mare masha hkying kaba gaw, tinang shim lum dum ai shara ni hta hprawng makoi yen hkawm taw nga nna malu masha hte garum ningtum lam ni ra ahkyak taw nga ai re.
Namhpakka majan ten mung shawa marai 9 asak si sum nna, laga lam hku na si hkrum ai marai 5, yawng pawng marai 14 rai nna, laga mung shawa marai 10 jan mung hkala sawng wa ai re.
Ndai ten ginra jasan ai magam bungli naw shang taw nga ai majaw, kaja ta tut ndai hta grau law na masa nga ai lam ginra masha ni tsun ai.
Namhpakka mare dum n’ta law malawng yawng hten mat sai majaw, Mung Chying Mung Shawa yawng dang di dang dep ai daram garum madi shadaw la na matu ginra masha ni hpyi shawn da ai re.
