Muse Deng 105 makau grup yin hta Myen hpyen dap maga nbungli hte shani shana wa htim gap gasat taw nga ai re.
Myen hpyen byuha kawng hpe dingdung daw dap hpawm hpung ni maga htim gasat zing madu kau lu sai lam, ginra masha ni tsun ai rai tim, KNG laksan san shateng lu ai lam n nga shi ai re.
“December 14 ya jahpawt jau hkying 4:30 hta Muse 105 mile Myen hpyen byuha dap angaw angam ni hpe dingdung daw dap hpawm hpung ni shang htim gasat zing ai hta Myen hpyen dap maga Jet Nbungli hte 13 lang, Holicopter the 2 lang, Muse Myen hpyen dap na အတွဲလိုက်ဒုံးကြည် hte 3 lang gap sharu bun wa ai nga”, n dau da ai re.
Lai wa sai November 27 ya shani kaw nna, Muse deng 105 hpe dingdung daw dap hpawm ni htim gasat taw nga ai gaw, n’htoi 14 ya na ai hpang, htim gasat zing madu kau lu ai lam tsun ai re.
Dingdung daw dap hpawm hpung maga htim gasat zing madu kau lu sai lam tsun ai raitim, Myen hpyen dap maga nbungli hte ding yang wa matut gap gasat taw nga ai re.
Myen hpyen dap maga Muse 105 Mile hpe n tat sum mat hkra nbungli hte laja lana htim gasat makawp maga ai raitim, kaja tatut lagaw dap hku nna hpyen garum tsep kawp n lu mat ai majaw, ya na zawn dap shara langai hpang langai hpe tat sum taw nga ra ai re nga, ginra masha ni tsun maram da ai re.
Ndai laman Muse makau grup yin hta Myen hpyen dap hte dingdung daw dap hpawm hpung ni lapran majan laja lana gap gasat hkat taw nga nna, laknak kaba n kau muse mare kata de mung wa hkrat ai lam ni nga ai hpe chye lu ai.
Muse muklum kata hta majan laja wa na masa nga ai majaw, mung shawa n kau tinang dum nta hta sumpan hpraw sharawt da ai lam nga ai hpe mung chye lu ai re.