KIO Magam Gun Marai Lahkawng Sat Hkrum Ai Mabyin, Pri Nem Ai Hte Hparan Na Matu KIA Hte TNLA Myithkrum
Mungmyit Sinli, Namhkam ginwang, Mung Wee makau hta TNLA Balawng dap ni bawm hkap kapaw ai majaw, KIO salang (2) asak si sum wa ai hte seng nna, KIA hte TNLA n tsa tsang salang ni shada pri nem ai ladat hte hparan na matu daw dan da sai lam, KIO shiga dap lithkam Dukaba Nhpang Naw Bu tsun ai re.
“Salang ni shada hparan hkat na ngu ai hku daw dan bawngban jahkrup da saga ai, shawng lam hta du nga ai npu tsang na ni gara hku byin ai ngu hpe ma TNLA maga sawk sagawn na hku tsun da ai, dai hpe kaba ai ni shada kahtet ai ladat hte n re sha katsi ai ladat hte hparan na matu tsun jahkrup da ai.” nga tsun dan wa ai re.
Lai wa sai December praw 5 ya shani, KIA dap ba 4 dung 8 na, Latgyi Nhkum Awng Myat hte Mung Wi Ginwang daw, Pang kanai ninghtawn uphkang Du Salang Kaba Lasang Zau Mun Awng yan gaw, Hkalum kaw na Mungwe de sa ai lam hta TNLA dap ni bawm hkap kapaw ai kaw, asak si sum mat ai rai nga ai.
Shan lahkawng gaw KIA Dapba 4 kaw na woi awn ai, pawng hpawm hpung ni hku nna, Mung Wi myen hpyendap de bungli shang na matu, Mung Wi mayan nga taw ai TNLA rawt malan hpung ni hpe shiga shana na matu, Cycle hte Hkalum kaw na lung wa ai ten, Mungwee ndu shi yang lam lapran e, TNLA kaw nna, remote bawm hte hkap kapaw dat ai kaw, marai 2 yan asak si sum mat ai lam, Namhpakka ginwang kaw nna, Dingda ginwang ginjaw de tang madun ai laika hta mu lu ai re.
Ndai mabyin lam hte seng nna, TNLA tsun shaga lit nga Dukaba Ta Aik Kyaw hpe KNG shiga dap kaw nna, nhtoi 4 ya tup matut mahkai ai rai tim, n rau ai lam sha bai htang shana wa ai re.
Mungmyit Sinli hta htim gasat majan baw taw nga ai ten, Kokang dap maga na KIA magam gun ni hpe gawt shapraw ai lam hte rim zing ri ai lam ni mung nga lai was ai re.
