Myen hpyen dap daru magam zing kau ai hpang, Myen hpyen dap hpe lam amyu myu hte rawt malan nga ai ten, rawt malan wuhpung mying hpe dut sha let, gumhpraw masu hpyi ai lam ni mung nga taw ai re.
Myen hpyen dap hpe ninghkap na matu, mung chying mung shawa yawng kaw na mung, tinang dang di lu lawm ai a tsam hte garum madi shadaw taw nga ai ai re.
Mung shawa ni garum madi shadaw ai hpe, ahkaw ahkang la nna, online n tsa hta PDF rawt malan hpung ni a sumla, facebook mying ni hte gumhpraw masu hta shagyin ai ni mung law law nga taw ai hpe sa gawn chye lu ai.
“Madung tsun mayu ai gaw, majoi joi nau hkum kam mu, ya gaw gumhpraw masu hpyi mat wa ai sha n ga na, tinang a shim lum lam hpe mung ahtu hkra wa chye ai, dai majaw, tinang garum madi shadaw mayu ai rai yang kaja nan tatut hta ra ahkyak taw nga ai ni hpe garum madi shadaw lu na yang kaja ai, tatut galaw taw nga ai ni hte shawng lu matut hkra shakut ra ai,” nga gumhpraw masu sha ai ni hpe sawk shapraw nga ai, Ko Bunng Bung tsun wa ai re.
Online n tsa hta dai zawn gumhpraw masu hta sha ai lam ni lani hte lani grau grau law wa taw nga ai majaw, kaja nan ta tut shakut shang lawm taw nga ai magam gun ni hte matut mahkai nna, garum na matu mung, rawt malan hpung maga tsun tawn ai re.
Ndai ten dai zawn rawt malan hpung ni hpe garum madi shadaw ai mying hte, Myen hpyen dap lata de rim hkrum mat ai ni mung law law nga taw ai majaw, mung shawa yawng kaw na mung sadi maja na lam rawt malan hpung maga na ni tsun sadi jaw da ai re.
Gumshem Myen hpyen dap hpe htim shagrawt majan gasat nga ai ten, mung chying mung shawa yawng kaw na mung, dang di dang dep ai lam hku na shang lawm gun hpai na hte, Myen hpyen dap a masu hkalem ai kata de n du mat wa na matu ja ja sa di maja nga na lam tsun da ai re.
Ya ten Facebook online n tsa hta rawt malan PDF dap ni a mying hpe dut sha let, gumhpraw tam nga ai Facebook acc 200 hkawt nga taw ai hpe mu lu ai lam NUG maga tsun da ai re.
