Kokang hte TNLA Lamu Ga Madu Mat Wa Ai Hte, Mungmyit Sinli Amyusha Ni A Myit Tsang lam
Kokang MNDAA hte Balawng TNLA dap ni kaw nna, 1027 majan masing hte Mungmyit Sinli ginra lamu ga law law hpe zing madu mat wa ai hte rau, matut manoi mabyin ni ntsa ginra masha ni myit tsang nga ma ai re.
Lai wa sai November shata htum maga hta Wunpawng Mungdan Shanglawt Hpung KIO salang kaba n kau, Munggu hte Bangsai ginra hta sa du dap shara jahkrat wa ai hpe, Kokang dap maga de na bai n htang kau dat ai mabyin ni nga wa sai re.
Dai zawn Mungmyit Sinli ginra hta Miwa Kokang hte Balawng ni up madu mat wa ai n tsa, mung shawa ni myit tsang ai lam hte seng nna, KIA shiga magam dap lithkam Dukaba Nhpang Naw Bu hpe san yu yang ndai zawn tsun wa ai re.
“Ya ten gaw rawt malan taw nga ai aten re, Mungmyit Sinli ga gaw rawt malan hpung ni grai nga ai, dai majaw rawt malan hpung shagu mung e n dai nye a lamu ga re ngu tsun na matu grai naw jau ai ten re, anhte mung moi kaji kawoi ni a prat ban kaw na lu tawn da ai kachin sub state ngu ai lamu ga hpe chyawm shamat kau na n rai nga ai, ndai ten rawt malan ten re majaw, hpyen masa hta hkan na rau jawm pawng nga ra ai lam gaw law law rai na re, dai re majaw, rawt malan ten hta anhte na re ngu na madu la ai zawn re ni, uphkang sai ru jahkrat ai zawn re lam ni gaw rai n galaw mai ai lam ni rai nga ai,” nga tsun ai re.
Mungmyit Sinli ginra hta Koakang hte Balawng dap ni Myen hpyen dap, dap shara law law hpe htim gasat zing madu mat wa ai ten, KIA dap maga de na, gasat ging gasat ang ai hpe lawan hkrang n shapraw ai a n tsa, ginra masha ni myit tsang wa ai rai nga ai.
Majan rai n byin shi ai ten ni hta mung, Kutkai Namhpakka ginwang kata, lamu ga hte seng nna, Balawng hte Jinghpaw lapran hta manghkang ni jahkring hkring byin lai wa yu sai re.
Dai zawn re lapran, dai ning October 27 ya shani kaw na, Mungmyit Sinli ginra shara shagu hta majan laja wa ai hte rau, Lamu ga ginra law law hpe Balawng hte Miwa Kokang dap ni htim gasat zing madu mat wa taw nga ai re.
Dai zawn zing madu mat wa ai, lamu ga ni Miwa Balawng lata de du mat wa na hpe Jinghpaw amyusha ni myit tsang taw nga ai re.
Munggu Hpawng seng hte Mungbaw ginra ni hta lai wa sai prat ban hte ban anhte Jinghpaw ni sha up madu lai wa ai rai tim, dai ni n dai ten hta Miwa Kokang dap ni kaw na up madu nga sai lam chye lu ai.
Miwa Kokang dap ni up madu nga ai hta, nta langai na hpyen la marai langai n galaw n mai ladat hte hpyen lahkawn ai lam ni mung galaw nga ai re.
