Mungmyit Sinli Namhpakka hta Myen hpyen dap n bungli bawm wa jahkrat bun ai hte laknak kaba hkrup mara gap shadam bun ai majaw, mung shawa marai 5 asak si sum wa nna n ta 10 jan hten mat ai lam, Namhpakka ginra masha ni kaw na chye lu ai.
December praw 6 hte praw 7 ya shana ting, Myen hpyen dap laknak kaba hte ding yang gap bun nna, nbungli hte mung wa gap ai majaw, mung shawa marai 5 asak si sum nna, hkala hkrum ai ni mung law wa ai nga dai ginra na mung shawa langai KNG de tsun ai re.
“December praw 6 ya shana maga de hkying 5 daram aten hta, Namhpakka Myen hpyen dap Hk.L..Y 123 dap na, hpyen la nkau hpe Holicopter nbungli hte wa htaw shapraw la mat ai, dai helicopter nbungli hpe shimlam la ya nga ai Nbungli langai hte Namhpakka mare lawk mali de laknak kaba gap bun ai hta si hkala law wa ai, praw 7 ya shana hta mung shana ting gap ai,” nga tsun dan ai re.
Nbungli bawm wa jahkrat bun ai majaw, asak 11 ning ra ma kaji hte asak 70 ning jan re ding gai langai mung, hkala hkrum wa ai lam matut chye lu ai re.
Ya ten Myen hpyen dap ni gaw, Namhpakka ginra masha yawng hpe shim lum ai shara de hprawng yen na matu, ahkang jaw sai lam chye lu ai.
1027 majan masing hpang wa ai shata mi jan hta, Namhpakka ginra hta mung shawa marai 20 daram asak si sum wa sai lam sagawn chye lu ai re.
