Kutkai Myen hpyen dap gap dat ai laknak kaba si, mung shawa nta wa hkrat ai majaw, ma kaji hte dum nta masha marai 3 tup asak si sum wa sai re.
November 28 ya shana hkying 10 jan ten, Kutkai Myen hpyen dap gap dat ai laknak kaba si gaw Hunawng mare makau, Tung Sin Lung mare hta wa hkrat ai majaw, ya na zawn si hkala hkrum ai re nga nna, ginra masha langai KNG hpe ndai zawn tsun dan ai re.
“Mana hkying 10 chyen daram hta, yawng yup pyaw taw nga ai ten, laknak kaba wa hkrat ai majaw, Kasha hte Kanu gaw dai kaw nan si mat nna, kawa gaw tsi rung du ai hte si mat ai,” nga tsun dan ai re.
Nta madu kawa hpe, machyi masha htaw mawdaw hte Kutkai tsi rung de htaw sa wa yang, Kutkai num shang lam numbraw hta Myen hpyen dap maga mawdaw hpe hkap gap ai hta, mawdaw leng baw mat nna, leng baw baw re hte tsi rung de du hkra shakut htaw sa mat ai rai tim tsi rung kaw du ai hte si mat ai re lam matut tsun dan wa ai re.
Asak si sum ai hkan nu wa ni gaw, 45 ning re Kawa Slg Naw Hkam, asak 35 ning re kanu Jan Am Pu hte asak 7 ning re kasha Lwin Am Kya ni rai nna, asak 2 ning re Mai Aik Nwe hte kaga nta na Lisu kasha Li Bo Tar ngu ai yan hkala sawng wa ai lam chye lu ai.
Dai n ta na kasha, Aye Noi hte Lwe I Hkam ni gaw hpa n ra ai re lam matut tsun ai re.
Dai zawn laknak kaba si a majaw nta masha yawng si hkala hkrum wa ai majaw, ya ten hkyak hkyak garum ning tum ra taw nga ai lam chye lu ai.
Ya ten Kuthkai Muse lam lapran majan laja lana matut gap gasat hkat nga nna, Hkrun lam yawng mung pat taw nga ai re.
