Myitkyina mare kaba kata hta ‘Taw Wet PDF’ ngu ai mying hte ph set nna gumhpraw hpyi hkawm nga ai lam, ginra masha ni kaw nna chye lu ai.
Ndai November shata 10 ya daram kaw nna, Myitkyina kata gat seng hte Phone seng kaba zawn re ni hpe, Phone hte matut mahkai wa nna, hkawn kang hta ai hku Sen 7, 8, jaw bang na matu, jahkrit sharim hpyi taw nga ai nga, Myitkyina mung shawa langai KNG de ndai tsun dan ai re.
“Hkawn kang sa bang u nga na tsun ai, gara kaw na rai ngu san yang PDF kaw na re nga, sen 7 gaw grai law ai, dai daram bang na n lu ai ngu yang, sen 4 tim sa bang u nga, masha nan sa jaw u nga, gat dut ra ai majaw n rau ai, n lu sa bang ai bai ngu yang, Kpay No. bai sa ya ai, n dai kaw na shagun wa rit bai nga ai,” nga tsun dan ai re.
Myitkyina muklum hta ya na zawn gumhpraw jahkrit hpyi hkawm ai lam hte seng nna, Myitkyina PDF dap ni hpe KNG maga matut mahkai san shaga yu yang, ya ten, shanhte maga dai zawn gumhpraw hta ai lam tsep kawp n nga ai nga KNG shiga dap de tsun wa ai re.
Ya na zawn gumhpraw tsun jahkrit hpyi ai lam gaw, PDF dap maga na tsep kawp n re ai zawn, Myen hpyen lagaw lata tai ai ni, PDF hpe mying jahten mayu nna, da sang galaw ai lam she re nga n dai tsun tsun ai re.
“Anhte maga na gaw tsep kawp n re, hpa majaw nga yang Myitkyina Myo ntsa kaw PDF nga yang anhte sha nga ai, lai wa sai ten mung Pyithutsit dap maga de na Hkat Cho de ya na zawn shaga masu la na mung shawa ni hpe sat kau ai lam nga ai, ya ma anhte n re, Myen hpyen dap n pu na ni galaw sha ai she rai na re.” nga Myitkyina PDF na lit nga ai langai KNG de tsun ai re.
Ndai zawn gumhpraw tsun jahkrit hpyi ai lam hpe mung shawa ni yawng mung a tsawm sadi let gara kaw na gadai ni re ai ngu hpe a tsawm chye ginhka la ra na re lam tsun ai re.
Jinghpaw mungdaw hta, Myen hpyen dap daru magam zing kau ai hpang, dai zawn gabaw amyu myu shaw nna, gumhpraw masu hpyi ai lam, lagu lagut damya mya ai lam ni, lani hte lani grau grau law jat wa ai re.
