Myen hpyen dap kaw nna, KIA ginjaw ginra Laiza makau Maisak pa, Namsan shara ni de, dai ni shani ka ang nbungli hte laja lana htim gasat wa ai lam chye lu ai.
Ndai laman Namsan hpyen man maga de majan byin ai lam n nga ai rai tim, Myen hpyen dap maga na, nbungli laknak kaba ni hte shani shagu ngu na sa gap bun taw nga ai lam shawng lam hpyen shi sawk ni kaw na chye lu ai.
“Jet nbungli 3 hte hkying hkum mi daram sa gap bun kau da ai, langai gaw shim lam la ya na, lahkawng gaw agying gap kau da ai, ya hte lu zing da ai Lailum Awng Ja hpe mung gap kau da ai,” nga tsun dan ai re.
Namsan hpyen man maga de laknak kaba ding yang gap shadam taw nga ai, Waimaw Shwe Nyaung Pin Myen hpyen dap Hk.L.Y (321) hpe, Wunpawng Mungdan Shawnglawt Hpyendap KIA Dung 3 ni, November praw 9 ya jahpawt jau hkying 1 daram hta Drone, laknak kaba hte sa gap bun wa ai lam shawng lam magam gun ni kaw na matut chye lu ai.
Sa htim gap gasat wa ai hta, Myen hpyen dap maga si hkala ai lam ni nga wa ai rai tim, gade daram gara hku sum machyi ai ngu hpe atsawm tup hkrak n chye lu ai re.
KIA dap maga sa htim gap gasat ai hpang, Myen hpyen dap kaw na mung laknak kaji kaba hte dai hpawt hkying 4 daram aten du hkra gap shadam bun wa ai lam ni nga ai hpe chye lu ai.
Ya ten Namsan Hpyen man maga de Myen hpyen n-gun matut htu shadut taw nga nna, Mali hka kau lam hku na mung Myen hpyen hpung ni lai taw ai la ginra masha ni tsun ai re.
Namsan makau grup yin hta ndai laman Myen hpyen dap hte KIA dap ni man hkrum gap gasat hkat ai lam n nga ai rai tim, laknak kaba ni hte shani shagu ngu na gap bun taw nga ai re lam chye lu ai.
