Hpakant, Sezin ginra KIA Dung 26 ginra, Man Zing hka makau dap jung tawn ai Myen hpyen dap shara 3 hpe KIA hte PDF pawng hpawm dap ni, gasat zing kau lu ai lam chye lu ai.
November praw 9 ya jahpawt jau hkying 3 daram aten kaw nna sa htim gap hpang ai gaw, jahpawt hkying 8 chyen daram aten dai dap shara masum hpe lu htim gap gasat zing kau lu ai lam, dai ginra na KIA magam gun langai KNG shiga dap de ndai zawn tsun dan ai re.
“Myen dap zing kau ai shara gaw, Hummalin maga na re, Sezin mare hte Uru hka sha din ai kaw na re, lai wa sai shata hta sha mung majan byin ai shara, dai hpawt hkying 3 daram kaw na laknak kaba hte shawng gap hpang ai, hkying 8 daram nga yang lu zing sai,” nga tsun dan ai re.
Matut na rai tim, Sezin Myen hpyen byuha dap hpe matut htim gasat taw nga nna, Myen hpyen dap maga nbungli hte ding yang sa htim gap taw nga ai lam atut tsun dan ai re.
Zing kau lu ai dap mying ni gaw, သံယောစဉ် kawng, Shwe Pyi Myint, Pan Shae’ ngu ai dap ni rai nna, dai shara ni yawng kawng marawn shara mi hta sha nga ai dap shara re lam ginra masha ni tsun dan ai re.
Myen hpyen dap shara hpe htim gasat zing ai hta, lahkawng maga si hkala lam ni nga ai rai nna, Myen hpyen dap maga de na sinat laknak machyu pala alaw alam zing madu la lu ai lam chye lu ai.
Dai dap shara ni gaw, Hummalin hte Sezin ginra hpe madung up madu mayu ai majaw, Myen hpyen dap daru magam zing kau ai hpang, 2021 ning kaw nna, Sam Hkyeng SNA dap hte pawng hpawm nna, wa du dap jung nga ai shara mung rai nga ai.
Myen hpyen dap shawng hta shagyit jahkrat nna, dai ginra hta lai sa lai wa mung mare masha ni hpe laja lana san jep ai hte gumhpraw hta sah taw ai shara mung re lam chye lu ai.
Daihpawt sa gap ai Myen hpyen dap shara gaw, , Jinghpaw ga shaga ai ni, hte shan hte n tsen nhten dum ai ni yawng hpe jahkring hkap rim nna, adup zingri ai lam ni galaw ai majaw, dai dap shara hpe sa htim gap gasat kau ai re nga, dai ginra na lit nga ai KIA magam gun langai KNG de tsun dan ai re.
Myen hpyen dap daru magam zing kau ai hpang, Sezin ginra hta Majan jahkring hkring byin wa ai rai nna, lai wa sai shaning hta mung laja lana gap gasat hkat wa sai re.
