Sagaing Htichyaik mare kata hta, Myen hpyen dap hte KIA woi awn ai PDF pawng hpawm dap ni lapran, majan laja lana gap gasat hkat wa ai majaw, hkrun lam hkawm mung shawa tsa lam, Hti Chyaik majan man hta pat hkrum taw nga ai re lam chye lu ai.
November praw 8 ya shana maga de kaw nna majan laja wa ai majaw, Myitkyina Mandalay, lam kaba hpe pat kau ai majaw, hkrun lam hkawm mung shawa tsa lam dai ginra hta pat hkrum taw nga ai lam, dai shara hta pat hkrun taw ai mung shawa langai KNG shiga dap de tsun dan ai re.
“Myitkyina kaw na yu wa ai, dai kaw du ai hte majan byin na n mai lai mat, anhte makau kaw sha sinat kaji kaba grai ngwi wa ai majaw, dai mawdaw kaw lawm ai ni yawng hprawng, shat sha na shara mung nnga, hkrun lam ntsa grai jam jau taw nga ai,” nga amyu shayi langai tsun dan wa ai re.
Dai majan gap gasat hkat taw nga ai shara de Myen hpyen dap maga de na, Jet fighter nbungli hte Holicopter ni hte sa gap garum taw nga ai lam, rawt malan dap maga de na tsun ai re.
“Myitkyina kaw na yu wa ai Jet nbungli langai hta bum lagaw kaw wa gap kau da ai, ngut na mare kata de mung Holicopter hte gap gayin kau da ai, Nbungli hte gap ai majaw Num langai si ai,” nga dai ginra na PDF lit nga ai ni KNG de tsun dan ai re.
Ya ten muklum kata hkrun lam hkawm mung mare masha tsa lam pat hkrum taw nga nna, jam jau hkrum taw ai lam chye lu ai.
Htichyaik muklum kata dap jung nga ai Myen hpyen dap maga na, Laknak kaba ni hte gap bun taw nga ai majaw, majan matut laja taw nga ai lam chye lu ai.
November praw 8 ya shana maga hkying 3 kaw nna, တကောင်း–ထီးချိုင့်– အင်းတော် mawdaw lam kaba hpe rawt malan hpung maga pat da ai lam ndau da ai re.
Myen hpyen dap ni gaw, ya ten Htichyik muklum kata Uphkang rung, Balik rung hte hpaji jawng ni hta sa makoi rawng taw nga ai lam chye lu ai.
Ndai November shata praw kaw na Sagaing ginra hta Myen hpyen dap hpe htim gasat hpang wa ai gaw, ya ten Muklum mare kaba 3 hpe htim gasat zing madu da lu sai lam, NUG maga tsun ndau da ai re.
