Mungmyit Sinli, Hpai Kawng, Pangsai mung shawa ni gaw, Miwa ga jarit de bai hprawng yen taw nga ai lam chye lu ai.
October 30 ya shani, Bang Sai mare kata, Myen hpyen dap, Balik dap hpe, Kokang dap hte KNO 108 dap ni sa htim gap gasat ai hta, Myen hpyen dap maga sum machyi law nna, mung shawa ni nga ai shara de hprawng makoi yen ma ai re lam, dai ginra na amyu shayi langai KNG shiga dap de tsun dan ai re.
“Ya hte Kokang dap ni sa gap ai shaloi gaw, mung mare masha ni nga ai mare de gan hprawng yen mat ai, Kokang ni pru mat wa ai hpang kaw na bai wa dung taw sai,” nga tsun dan ai re.
Pang Sai Myen hpyen dap hte Balik dap ni hpe, Dingdung daw dap hpawm hpung ni kaw na, November praw 1 ya shani htim gasat zing kau nna, dai dap shara ni hpe wan nat jahten kau da nna, bai pru mat wa ai lam chye lu ai.
Dai zawn Kokang dap ni bai pru mat wa ai hpang, Myen hpyen n gun bai jat nna, hpyen n-gun 300 daram hte mi na dap shara hta bai wa dung taw sai lam ginra masha ni tsun dan ai kaw na chye lu ai.
Munggu, Hpawng Seng de na hprawng yu wa ai Myen hpyen hpung ni mung, Pang Sai Myen hpyen dap shara hta wa pawng nga taw ai lam matut chye lu ai re.
Myen hpyen n-gun kaba hte wa du dap jung nga ai Pang Sai muklum makau grup yin hpe, Kokang dap ni kaw na bai htim gasat na matu hkyen wa ai majaw, dai ginra hta nga ai mung shawa ni yawng hpe gan hprawng yen na matu Kokang dap ni kaw na tsun wa ai majaw, ya ten dai ginra na mung shawa ni, Myen Miwa ga jarit hta sa du hprawng yen taw nga ai lam ginra masha langai ndai zawn matut tsun dan ai re.
“Anhte Pang Sai gaw grai myit tsang ra ai madang kaw du nga ai da. Hkoize (Kokang) ni anhte mung shawa ni hpe yen mu nga majaw, anhte mung shawa ni miwa jarit Wan Din hka kau hku hku hprawng yen taw nga ga ai,” nga matut tsun dan wa ai re.
Ya ten dai ginra hta majan kaba byin wa na hpe ginra masha ni myit tsang let, mai byin ai hku miwa ga jarit mayan de hprawng yen hkawm taw nga ai lam chye lu ai.
Mungmyit Sinli ginra hta, Dingdung daw pawng hpawm rawt malan hpung ni kaw na 1027 majan hpaw gasat wa ai hta, Myen hpyen dap shara law law hpe lu htim gap gasat zing madu la lu taw nga ai re.
