Lisu amyusha ni yawng nta langai Pyithutsit hpyen la marai langai n galaw nmai, mying bang ra na rai nna, masat da ai shani du hkra mying n sa bang ai ni hpe nta di di hkan rim woi na re lam, U Shwe Min tsun ai re.
Myen hpyen dap npu, U Shwe Min hpung ni gaw, October 30 ya shani ndau laika langai shapraw da nna, November praw 9 kaw nna, 22 ya shani du hkra mying n sa bang ai ni hpe nta di di hkan rim woi na re lam, ndau da ai re.
Ndai hpyen lahkawn ai lam hpe, Waimaw ginwang kata shawng hpang na rai nna, dai kaw na Jinghpaw Mung ting madang hpyen lahkawn nna, Pyithutsit hpaw sa wa na re lam, Slg Shwe Min KNG de ndai zawn tsun ai re.
“Madung gaw Waimaw kaw na hpang na, madung Lisu amyu sha ni hpe tsun mayu ai re, laga amyu bawsang ni mung shang wa mayu ai ni yawng hpe hkap la ai, anhte Lisu amyu sha ni nga ai shara shagu Pyithutsit hpaw hpyen lahkawn sa wa na re. Putao, Hkawng Lan Phu, Chihpwi, Saw law yawng anthe Lisu amyu sha ni nga ai shara re,” nga tsun ai re.
Slg Shwe Min gaw, Myen hpyen dap daru magam zing kau ai hpang, 2021 ning November shata hta Wuyan mare kaw hpaw hpang wa ai hpung re lam chye lu ai.
Dai zawn Myen hpyen dap hte pawng hpawm nna, KIA dap hpe htim gasat taw nga ai Pyithutsit hpung mung rai nga ai.
Ndai zawn Pyithutsit hpyen la galaw na lam hte seng na, ndau wa ai gaw, amyu sha shada lapran dumbri dumbra byin shangun ai lam re nga, Lisu shingni hpung na, Slg Yaw Ti Pha KNG de ndai zawn matut tsun dan ai re.
“Dai gaw anhte Lisu amyu sha ni lapran hta n pyaw dik byin shangun ai lam rai nga ai, amyu sha shada lapran dumbri dumbra byin shangun wa mai ai baw re, U Shwe Min kaw na ndai zawn tsun taw ai rai tim, n hkap la na ni gaw nhkap la ai sha re,” nga tsun ai re.
Ndai laman Namsan majan hta Myen hpyen dap gaw, Slg Shwe Min Pyithutsit hpung ni hpe jai lang akyu jashawn wa ai mung rai nga ai.
Myen hpyen dap a Pyithutsit hpaw masing hta, amyu sha ni gadai n shang lawm na matu, KIO Ningbaw kaba Dukaba Nban La, October 25 ya KIO masat nhtoi mungga hta tsun wa ai re.
