Munggu, Hpawng Seng, Mungbaw ginra ni hpe Kokang MNDAA uphkang hkrang masa hte sa taw sai lam, ginra masha ni tsun ai re.
Dai ginra Myen hpyen uphkang hkrang hpe dawm kau nna, Kokang MNDAA uphkang hkrang hpaw shabawn da lu sai lam, Kokang dap maga na mung tsun ndau da ai re.
Munggu, Hpawng Seng hte Mungbaw ginra yawng hpe, November praw 7 ya shani ga-ang hkying 12:40 ten hta yawng zing madu kau lu sai majaw, November praw 8 ya shani kaw nna, Munggu ginra uphkang lam hpe hpaw masat da lu sai lam tsun tawn ai re.
1027 Majan masing hte Dingdung daw dap hpawm hpung ni kaw nna, October 27 ya shani Mungmyit Sinli ginra hta Myen hpyen dap hpe htim gasat hpang wa ai gaw, dai ni nhtoi 12 ya laman Myen hpyen dap shara 125 hpe zing madu lu sai lam tsun da ai re.
Myen hpyen dap shara law law zing madu la lu ai hta, Hpawng Seng, Munggu, Mungbaw, Pang Sai, Sinli, Chin Shwe Haw, Kun Lung ginra ni yawng hpe zing madu da lu sai lam tsun ndau da ai re.
Dai zawn Myen hpyen dap zing madu ai hta, Myen hpyen dap laknak kaji kaba alaw alam zing madu la ai hta, hpri gang Thank mawdaw 7 hpe mung zing madu la lu sai lam chye lu ai.
Ya ten Kokang MNDAA dap woi awn ai majan hta, Mungbaw, Munggu, Hpawng Seng ginra yawng Kokang MNDAA uphkang hkrang hte sa taw sai lam ginra masha ni tsun ai kaw na chye lu ai.
