Myitkyina Manmaw lam kaba ntsa, Gangdau Yang Myen hpyen dap hpe Wunpawng Mungdan Shanglawt Hpyendap KIA kaw nna, dai hpawt manap hkying 8 daram hta gasat zing kau lu sai lam chye lu ai.
October 31 ya jahpawt jau, hkying 6 daram aten, Myitkyina Manmaw lam ntsa, Gangdau Yang hte Mali Myen hpyendap hpe sa htim gap gasat ai hta, Gangdau Yang Myen hpyen dap hpe lu htim gap gasat zing kau ai re lam chye lu ai.
Dai zawn Majan laja taw nga ai ten, Myitkyina de na nbungli hte sa htim gap ai majaw, Ja Hta mare na mung shawa dum nta 6 daram wan hkru hten mat ai nga, Dukaba Nhpang Naw Bu KNG shiga dap hpe ndai zawn tsun ai re.
“Gangdau Yang kaw byin ai, Mali kaw byin ai, Gangdau Yang Myen hpyen dap hpe gaw lu zing sai nga tsun ai, nbungli hte mung wa gap bun taw nga ai, Nbungli hte gap ai majaw, Jahta mare na nta kru wan hkru hten mat ai, Lailum Awng Ja de mung nbungli hte wa gap taw nga ai.” nga tsun ai re.
Myen hpyendap gaw Gangdau Yang makau grup yin hta nbungli hte wa htim gap gasat ai majaw, Ja Hta mare dum nta 6 wan hkru hten mat ai lam, matut chye lu ai.
KIA padang dip zing la lu ai, Lailum Awng Ja maga de mung, Myen hpyen dap maga nbungli hte laja lana wa htim gap gasat taw nga ai lam matut chye lu ai.
Dai hpawt zing madu la lu ai Gangdau Yang Myen hpyen dap gaw, Myitkyina Manmaw lam kaba ntsa hkrun lam hkawm mung mare masha ni hpe laja lana san jep ai shara rai nna, dai shara gaw hpyen masa lam hta ahkyak dik shara re lam chye lu ai.
Dai hpawt manap jau, Bumre bum Myen hpyen dap kaw na, laknak kaba gap shadam dat ai hta, Laiza Munglai Hkyet makau grup yin hta wa hkrat ai re hpe chye lu ai.
