Shiga

Awngja Majan Hta Shanglawm ai Daphpawm ni hpe Masat Masa Lam Galaw

Awng Ja htim gasat majan hta shang lawm ai dap hpawm hpung 5 hpe, Wunpawng Mungdan Shanglawt Hpyendap KIA Dap awn daju kaw nna, chyeju dum masat laika shalai ai lam chye lu ai.

Lai wa sai June shata 16 ya shani kaw nna, Namsan hpyen man maga de Myen hpyen dap hpyen n’gun kaba hte htu shadut lung wa ai hpe, KIA, KPDF dap hte rau, tinang asak hpe ahkyak n shatai ai sha, shang makawp maga lawm ai, hpu nau dap hpawm hpung ni yawng hpe, Wunpawng Mungdan Shanglawt Hpyen dap Dai lawn rung kaw nna, masat masa shagrau ai lam tsun tawn ai re.

Dai majan hta htim gasat shang lawm ai dap hpawm hpung ni gaw, Rahkaing AA, Mung shawa makawp maga dap PDF, Dingdung daw Jawngma dap ABSDF-NB, Hkang amyu sha rawt malan hpung CNF, hte KukiĀ  amyu sha rawt malan hpung KNA-Burma ni re lam tsun da ai hpe chye lu ai.

KIA Dap-awn daju kaw na, shagun ya ai masat shagrau laika pa hpe hkap la lu ai lam, NUG asuya makawp maga hkring mang PDF hpyen awn daju rung na mung October 24 ya shani n dau laika shapraw da ai re.

PDF dap maga shapraw ai n dau laika hta mung, anhte PDF dap maga de na mung KIA hte rau laga rawt malan hpu nau ni hte lata gindun nna, gumshem Myen hpyen dap hkrat sum mat hkra hte Federal Democracy munghpum mungdan pru wa lu hkra matut shakut sa mat wa na re lam tsun da ai re.

Related Articles

Back to top button