Ga sau htu masing ninghkap ai majaw rim hkrum ai Hpare ginra masha, amyu shayi marai 25 bai lawt pru wa sai lam chye lu ai.
Shanhte hpe mani shani ga-ang rim da ai rai nna, dai ni shani ga-ang hkying 12 chyen daram hta bai dat ya sai lam, Hpare ginra masha langai KNG shiga dap hpe shana wa ai re.
“ya ya sha, rai nga ma ai, ya mi yet sha bai dat ya sai. Mi yet hkying 12 chyen ram hta rai nga ai.” nga nna, tsun ai.
Hpare mare grup byin hta ga sau n htu na matu, lai wa sai April shata kaw nna, mare masha ni alang alang laika bang, n’gun madun let ninghkap wa ai rai nga ai.
Hpare ginra hta, ga sau htu na matu shawng ningnan masing shang wa ai ten, lamu ga sum machyi manu jaw na re nga nna, ginra masha ni hpe ga sadi jaw let htu shaw hpang wa ai re lam, ginra masha ni maga tsun ai re.
Raitim mung, gumhpraw n jaw ai zawn, mare shinggan hkan htu shaw ngut ai hpang, ya Hpare mare kata de nan bai htu shang wa ai majaw mung mare masha ni ninghkap nga ai re lam chye lu ai.
KIO Sinpraw Dingdung Ginwang Ginjaw, Masat (7) Dapba na Salang Kaba langai gaw “Anhte asuya hku na mung, shanhte mare masha ni hpe chye na hkra, yawng gaw sang lang sai rai nga ai. Dai shang gumhpraw ni hte seng nna, shang wa ai gumhpraw ni hpe gara hku hparan ai, hpare kaw bai jai na re, yawng tsun jahpra da chyalu re. ndai kaw na mare masha ni mung, dai hpa atsawm nau n chye na na rai sam ai, kalang kalang dai hku, kasu kabrawng byin wa wa re” nga nna tsun ai re.
Masing ninghkap ai mung shawa ni kasu kabrawng byin wa ai majaw, shanhte hpe jahkring mi gan hkang zing da ai re nga nna, matut tsun ai re.
Hpare ginra, Wunpawng Mundan shanglawt Asuya KIO/KIA kaw nna, Miwa company ni hpe ahkang jaw let, Lai wa sai 2021 ning hpang daw kaw nna, ga sau htu shaw sha hpang wa ai rai nga ai.
Lamu ga shara law law dam hkra htu sha ma wa nna, hpyenyen mung mare masha ni nga ai, Hpare ginra kata de du hkra bai htu shaw hpang masing shaw dingyang rai nga ai lam Hpare mare masha ni tsun ai re.
Dai majaw, galaw lu galaw sha shara tat sum ra na hte, shinggyim nga pra lam hpe hkra machyi wa na myit tsang ai, ginra mung mare masha ni hku nna, mare kata shing n rai mare the kahtep nna, Gasau n htu na matu ninghkap nga ai re lam tsun nga ai re.