Waimaw Jamga langu sun kaw hkai nmai sara galaw nga ai Miwa la langai Sinat pala hkra nna, hkala hkrum wa ai nga, ginra masha ni tsun shana wa ai re.
July 26 ya shana hkying 7 chyen aten, Jamga Ninghtawn Nihkuti (နီခူတီ) mare na ထိန်မင်း langu sun kaw bungli galaw nga ai Miwa la langai lata hte lahput kaw sinat pala hkra nna, hkala hkrum wa ai lam, dai ginra nga ai mung shawa langai KNG shiga de ndai zawn tsun wa ai re.
“Mana hkying 7 kaw gara maga na gap ai re n chye ai sinat pala hte langu sun kaw Sara galaw nga ai Miwa la hpe lagaw lata shara lahkawng kaw pala hkra nna hkala hkrum ai, Waimaw tsi rung kaw tsi tsi hkam la taw sai,” nga tsun ai.
Sinat pala shara lahkawng kaw hkra ai hta, lata kaw hkra ai gaw, hkren mat wa nna, lahput kaw hkra ai gaw, ningma hkala sawng ai daram sha byin ai majaw, asak shim lum lam a matu gaw hpa n tsang ra ai lam matut chye lu ai.
Hkala hkrum ai Miwa la hpe dai shana jang, garum kahtau mawdaw hte Waimaw Tsirung de htaw mat ai lam hpe chtye lu ai.
Dai miwa la gaw, Miwa mung, Yunan mungdaw Yan Jiang muklum nah kai sun sara langai re lam chye lu ai.
Sinat gap hkrum ai lam hte seng nna, gadai gara wuhpung maga na gap ai pala re ngu hpe tup hkrak n chye lu shi ai re.
Ndai laman dai ginra hta majan byin ai lam hpa n nga ai rai tim, Myen hpyen maga Waimaw de hpyen htu shadut ai lam ni gaw ding yang galaw nga ai re hpe chye lu ai.
