Myen hpyen dap gaw ya ten mare kahtawng law law hta Pyithutsit hpung ni hpe ladat shaw hpaw ninghtan wa ai lam hta, Mungchying mung shawa kadai mung n shang lawm na matu, KIO Tinyang Up Dukaba Nban La tsun ai re.
Myen hpyen dap daru magam zing kau ai hpang kaw na, Jinghpaw mungdaw kata mare kahtawng shagu hta, Myen hpyen dap gaw shanhte a lagaw lata tai na matu, ginra masha ni hpe Pyithutsit atit anang hpaw shangun nna, mung mare masha shada hpyen tai hkat wa hkra galaw taw nga ai lam, (63) ning hpring KIO masat nhtoi mungga hta tsun da ai re.
“Lam shagu hta yakhkak ginchyum chyat wa nga sai gumshem hpyen kongsi gaw, mare kahtawng law law hta Pyi Tu Tsit hpung ni hpe ma-ja ladat hku hpaw ninghtan wa nga ai” nga tsun da ai re.
Myen hpyen dap gaw, Pyithutsit hpyen n’gun law wa hkra hte KIA dap hte majan byin wa hkra tara n shang ai gumhpraw tam ahkaw ahkang lam ni hpe jaw masu nna, galaw taw nga ai lam mung masa yu maram ai ni kaw na tsun maram tawn ai re.
“ Myen hpyen dap gaw, Jinghpaw mungdaw kata hta, Pyithutsit hpung ni hpe kani nang hpam lu sha dut mari ai ni law wa hkra, kani hkai shangun ai lam, dut mari shangun ai lam, Myen hpyen dap hte Pyithutsit pawng hpawm nna, tara n shang n-hprang htu shaw sha ai lam ni hte, Miwa shaga bang nna, tara n shang ai magam bungli ni hpe galaw na ahkang ni jaw da ai,” nga mung masa yu maram ai salang langai tsun ai re.
Myen hpyen dap daru magam zing kau ai hpang, Waimaw, Jahtuzup, Kamaing lam mayan ni hta Pyithutsit hpyen n gun ja wa ai rai nna, KIA dap hte gap gasat hkat ai lam ni jahkring hkring byin taw nga ai re lam chye lu ai.
Dai ni na mungga hta, ra lata poi galaw na shakut taw nga ai Myen hpyen dap a masing hta mung chying mung shawa ni kadai n shang lawm na matu, matut tsun tawn ai re.
KIO gaw Myen hpyen gumshem dap hkrat sum mat hkra gasat sa wa na rai nna, Panglung ga sadi hta mahta ai Federal Democracy mungdan gaw de sa wa ai lam hta shakut taw nga ai lam tsun da ai re.
