Shwegu mare numshang shara lahkawng hta, Myen hpyendap gaw kawa shagyit galaw nna, lai wa lai sa mung mare masha ni hpe laja lana san jep taw nga ai lam chye lu ai.
Lai wa sai October 20 ya shani kaw nna, Shwegu kaw nna Manmaw de lung wa ai lam numbraw hta shara mi, Mandalay maga de yu wa ai lam numbraw hta shara mi, shara lahkawng kaw kawa yan grang let shagyit jahkrat tawn nna, lai sa lai wa ni hpe san jep taw nga ai nga, dai ginra na mung shawa langai KNG shiga dap de tsun dan ai re.
“Madung dai kaw san jep ai gaw, mung chying masat madung san jep nna, gara de sa na, gara kaw na wa ai, hpa sa galaw na dai ni san ai ga rai nga ai, shan hte dai hku san jep taw nga ai majaw, anhte mung shawa ni gaw myit n shim ai le,” nga tsun dan ai re.
Dai shagyit ni hta Myen hpyen n-gun 80 daram hte jahpawt hkying 6 kaw na, shana hkying 6 du hkra san jep taw nga ai majaw, mung mare masha ni a matu hkawm sa hkawm wa lam hta yak hkak dut dang nga ai re lam chye lu ai.
Myen hpyen dap ya na zawn ladu lai san jep wa ai gaw, October 18 ya shani Shwegu Myen hpyen dap, Ta Wa Tai kawng hpe KIA PDF pawng hpawm dap ni, sa htim gap gasat zing kau ai majaw, ya na zawn ladu lai san jep hpang wa ai re nga tsun ai re.
Dai zawn shagyit jahkrat let san jep taw nga ai sha n ga, muklum kata shara jahkrat nna, masha shi, hkun majaw nga let shim lam jahkrat tawn da ai lam ni mung nga ai nga, ginra masha ni kaw na chye lu ai.
Lai wa sai October 18 ya shani Shwegu Myen hpyen dap hpe sa htim gap gasat ai hta, KIA, PDF dap maga de laknak machyu pala alaw alam padang dip zing la lu ai lam chye lu ai.
