Hpakant ginra, ANang Pa hte KIA Dapba 9 hpe Myen hpyendap nbungli hte htim gasat ai hta, KIA Dukaba nkau hkrat sum mat ai lam chye lu ai.
October 16 ya shana maga de hkying 4 chyen daram aten hta, Myitkyina kaw nna lung wa ai Myen hpyen Jet Fighter nbungli 3 gaw KIA Dapba 9 hte, ANang Pa mare kaw nan, Bawm 5 lang wa jahkrat bun kau da ai hpang, Ginsi Myen hpyen dap kaw nna laknak kaba ni hte gap bun wa ai hta, KIA Hpa-awn tsang na, Dukaba tsang hte kaga hpyen ma tsang na magam gun marai 10 daram si hkala hkrum ai re lam, dai ginra na mung mare masha ni kaw na chye lu ai.
“KIA Dapba 9 hte Anang Pa shara lahkawng hpe kalang ta sa htim gap ai ga rai nga ai, Dapba 9 hta gaw nbungli 3 hte Bawm 5 sa jahkrat kau da nna, Ginsi Myen hpyen dap kaw na gaw Anang Pa Goft pa de laknak kaba hte ding yang gap bun wa ai, gap ai shara jawm n bung ai, Anang Pa kaw gap ai gaw minute 5 ram hta kalang kalang dai hku gap bun ai,” nga tsun dan ai re.
Myen hpyen dap maga dai zawn nbungli, laknak kaba ni hte gap bun ai majaw, KIA Dapba 9 kata na Dukaba marai 2 hkrat sum wa nna, marai 4 hkala hkrum wa ai hte, ANang Pa mare hta gaw, Dujum tsang marai 2 asak ap nawng wa nna, marai 1 lagaw maga mi hkala sawng ai lam chye lu ai.
Ndai lam hte seng nna KNG sagawn lu ai daram KIA Dapba 9 na, hpa-awn tsang hte hpyen ma yawng pawng marai 10 daram asak ap nawng wa ai lam na lu ai rai tim, laksan KIA dap maga de san shateng lu ai lam n nga shi ai re.
Dai zawn laknak kaba gap bun ai hta, ANang Pa Goft pa hte gat seng langai hta laknak kaba wa hkrat ai majaw, KIA hpa-awn tsang nkau hte mung shawa n kau hkala hkrum wa ai lam ginra masha ni tsun ai re.
KIA Dapba 9 hte ANang Pa gap hkrum ai hta asak ap nawng mat wa sai ni a mying hte tsang hpe a tsawm tup hkrak n chye lu shi ai re.
Lai wa sai 2022 ning October 23 ya shani 62 ning hpring KIO Party masat n htoi hpe hkap tau lamang galaw nga ai ten, Myen hpyen dap nbungli hte wa gap bun ai majaw, masha marai 60 jan asak si sum wa nna, marai 100 jan hkala hkrum wa ai re.
Dai majaw, ya du wa na October 23 ya shani lup tsan, myit dum akyu hpyi hpawng lamang galaw na hkyen taw nga ai ten, ya na zawn kalang bai gap gasat hkrum wa ai rai nga ai.
Myen hpyen dap kaw na Jinghpaw Mungdaw de nbungli hte laja lana htim gasat ai majaw, masha wuhpung nawng asak si sum ai mabyin 3 lang nga lai wa sai re.
