Ma-U Pin majan hta Myen hpyen hpung ni mung mare masha nta nat jahten
Hpakant Ma-U Pin mare hta Myen hpyen hpung ni Bawm hte hkap gasat hkrum nna, si hkala hkrum wa ai majaw, dai mare na dum nta lahkawng hpe nat jahten kau ya ai lam, ginra masha ni kaw na chye lu ai.
October 14 ya jahpawt jau hkying 4 daram aten Nam Ya kaw na Kamaing de lai yu wa ai Myen hpyen hpung ni hpe Wunpawng Mungdan Shawnglawt Hpyendap KIA Dung 44 ni, Ma-U Pin mare makau kaw hkying 9 daram aten Bawm hte hkap shingla gasat dat ai kaw Myen hpyen dap maga sum machyi lam law wa ai nga dai ginra na mung mare masha langai KNG shiga dap de tsun dan ai re.
“Daihpawt hkying 9 daram aten anhte maga na ni Bawm hte 3 lang hkap anut jaw dat ai, Myen hpyendap maga marai 2 si nna, tsawm ra hkala sam ma ai, dai majaw kun, anhte mare na nta lahkawng nat kau ya ma ai.” nga tsun dan ai re.
Myen hpyen dap ni nat jahten kau ai nta gaw Saranum Chyinghtawng Htu Nan hte Slg Maran Naw ni a n ta lahkawng re lam chye lu ai.
Lahkawng maga gasat hkat ai hkying hkum chyen mi daram na ai re.
Myen hpyen dap maga de sinat gap jahkrit, nta wan nat re lam ni a majaw, Ma-u Pin mare masha ni, ya ten ni nawn ai shara de hprawng yen taw nga ai lam chye lu ai.
Nam Ya kaw na yu wa ai Myen hpyen hpung ni gaw, lai wa sai shata hta Mogaung de na lung wa ai Myen hpyen hpung ni rai nna, October 10,11 ya shani hta Hpakant lam Senghpra, Kapmaw, Nlung dup mare ni hkan shamu shamawt hkawm ai Myen hpyen hpung ni rai nna, dai ginra na mung mare masha marai 10 jan hpe mung rim woi da ai lam chye lu ai.
