Nmawk, deng 5 shagyit makau na dum nta langai hte nawku jawng wang hpe Myen hpyen dap ni damya shang mya ai hta, ja rai hte gumhpraw sen 100 jan la mat wa ya ai nga, Nmawk ginra masha ni kaw na chye lu ai.
October 13 ya shana hkying 10 daram aten, Nmawk Lungja bum pawt hta shara la nga ai Myen hpyen la marai 10 jan gaw, deng 5 shagyit makau na, wutdek nta langai hte Nawku Jawng wang hpe damya shang mya ai hta, Ja rai hte gumhpraw sen 100 jan hpe la mat ya ai sha n ga, n ta madu hpe mung rim woi mat ai lam, Nmawk ginra masha langai KNG shiga dap hpe tsun ai re.
“Myen hpyen la marai 10 daram hpyen hking hte hkrak rai damya sa shang mya mat ai, Nawku Jawng na alu sen latsa hte Ja rai ni, sengke ni la mat ai, nta madu hpe mung rim woi mat ai. Dai Myen hpyen la ni gaw, NUG hpe shawk na i? shawk mu le nga ni tsun jahkrit kau da ai,” nga tsun ai re.
Damya sa mya ai hta, nta madu hpe mung rim woi mat ai majaw, nta kata na arung arai ni gade daram gara hku lawm mat wa ai hpe a tsawm tup hkrak rai n chye shi ai sha n ga, nta madu lawt wa ai lam nga, n-nga hpe mung atsawm n chye lu shi ai re.
Nta hte Nawku jawng hta damya rai n shang mya shi yang, deng 5 Myen hpyen dap shagyit gap gasat hkrum ai majaw, Manmaw goft pa lam makau hku na lai wa ai seng ke 5 hpe hkap rim la nna, wan nat jahten kau ya ai re lam chye lu ai.
Dai Myen hpyen hpung ni gaw, lai wa sai 2022 ning October shata kaw na, Lungja bum pawt hta wa du dap jung nga ai hpyen hpung ni re lam chye lu ai.
