Hkaya Bum hta dap jung ai Myen hpyen dap ni September 28 ya shani Laiza makau grup yin de laknak kaba gap shadam bun ai hta, Mung Lai Hkyet Rahkaing AA dap kaw wa hkrat ai majaw, Rahkaing Du Jum langai asak si sum nna, laga hpyen ma law law hkala hkrum wa ai lam chye lu ai.
September 29 ya shani hta mung laknak kaba matut gap bun nga ai rai nna, dai na maga jan du wa ai ten hta, n bungli hte mung bai sa gap bun wa ai lam chye lu ai.
Ndai laman Hka Ya Bum hta dung ai Myen hpyen dap ni Laiza makau grup yin de laknak kaba ding yang gap shadam bun wa ai majaw, Munglai Hkyet hta nga ai Hpyen yen n kau, laga shara de hprawng yen hkawm taw nga ai lam, Mung Lai Hkyet amyu shayi langai KNG de n dai zawn tsun dan ai re.
“Ndai laman Myen hpyen dap ni laknak kaba gap bun ai, mung shawa ni nga ai makau kau kaw sha wa hkrat taw nga ai majaw, an nu ni Sut Mu Awng de yen sai.” nga tsun dan ai re.
Dai zawn laknak kaba wa hkrat kapaw ai majaw, dai makau hta nga ai, asak 60 ning jan re ai Lisu dinggan langai salum kahpra nna si mat ai lam nga ai hpe chye lu ai.
Mani September 28 ya shani Munglai Hkyet de laknak kaba 4 lang gap bun ai hta, Rahkaing AA dap hta 3 wa hkrat ai lam chye lu ai.
Myen hpyen dap maga dai zawn, Rahkaing AA dap de sha ang nna, gap bun ai lam hte seng matai bai htang mat wa na re lam, Rahkaing AA dap na tsun shaga ahkang lu, Hkai Thu Kha kaw na, shiga dap ni de tsun da ai re.
Ndai laman ginjaw ginra Namsan Yang makau grup yin de gap gasat hkat taw nga ai hta, Rahkaing AA dap ni KIA maga de gap gasat lawm taw nga ai a majaw, Myen hpyen dap maga ya na zawn gap gasat wa ai rai na re nga ginra masha ni tsun maram da ai re.