Sumpra Bum maga de hpyen n gun garum lung wa ai Myen hpyen hpung ni hpe KIA dung 4 ni, Hpung Ing hka mahkrai makau hta hkap gasat dat ai lam chye lu ai.
September 22 ya shana maga hkying 1:00 daram aten Myitkyina maga na lung wa ai Myen hpyen hpung ni hpe, Tayang Zup rai n du yang na, Hpung Ing hka mahkrai kaw hkap shingla gasat dat ai lam shawng lam hpyen shi sawk ni kaw na chye lu ai.
Dai hkap shingla gasat ai hta, lahkawng maga sum machyi ai lam hpe a tsawm tup hkrak n chye lu ai re.
Ya ten Sumprabum, Putao de lung wa, yu wa lam ni yawng hpe naw pat da ai lam chye lu ai.
September 20 ya shani Daru Hka mahkrai baw hta dung ai Myen hpyen dap hpe KIA/ PDF dap ni sa htim gap gasat kau ai hpang, ya na zawn lam pat da ai rai nga ai.
Sumprabum-Putao lung wa ai mung mare masha ni hpe Tayang Zup kaw na n lai shangun mat ai hte, dai kaw na bai n htang yu wa shangun ai kau ai re lam chye lu ai.
Dai zawn bai n htang yu wa ai ramma marai 10 jan hpe Tanghpre Myen hpyen dap gate hta hkap rim da ai lam ginra masha ni kaw na chye lu ai.
Dai rim woi da hkrum ai mung mare masha marai 10 jan gaw gara kaw na gadai ni re ai ngu hpe a tsawm tup hkrak n chye lu ai rai nna, lawt wa n lawt wa ngu ai hpe mung a tsawm tup hkrak n chye lu ai re.
Myen hpyen dap maga ya na zawn mung mare masha ni hpe hkap rim san jep ai lam ni galaw nga ai majaw mung shawa yawng sadi maja let hkawm sa na dai ginra na mung shawa langai tsun ai re.
