Hpakant Sengtawng mare hta, Myen hpyen balik marai 3 jawn wa ai mawdaw hkap gap hkrum ai hta, marai langai si nna, marai langai hkala hkrum wa ai lam, ginra masha ni kaw nna chye lu ai.
September 21 ya shana maga hkying 5 daram aten, Sengtawng kaw nna, Hpakant de tsi gawk sa madun na matu sa wa ai lam hta, hkap gap hkrum wa ai re lam dai ginra na mung shawa langai KNG shiga dap de tsun dan ai re.
“ Seng Tawng kaw na Hpakant de yu wa ai, sha naw pru wa ai hte hkap gap hkrum ai, langai si na langai hkala sawng ai ga rai nga ai, mawdaw ma yawng hten mat ai.” nga tsun ai re.
Dai gap sat hkrum ai wa gaw, Balik gyi jum Win Zaw Oo ngu ai wa rai nna, hkala hkrum ai marai 1 hpe Hpakant mung shawa tsi rung de htaw mat ai lam chye lu ai.
Dai Myen hpyen balik ni hpe sa gap sat ai gaw, KPDF ni mai byin ai lam ginra masha ni tsun ai rai tim, KNG maga lak san n lu san shateng ai re.
Hpakant hta Myen hpyen dap hte KIA KPDF dap lapran hta gyam sat hkat ai lam ni jahkring hkring byin nga nna, n tsen n hten ai ni hpe sat ai lam ni mung ding yang byin nga ai re.
Lai wa sai September 20 ya shani hta mung Hpakant numshang, Pantin mahkrai hta dung ai Myen hpyen balik dap hpe KPDF dap ni sa gasat ai hta, Myen hpyen balik maga de na sum machyi lam ni nga wa ai hpe chye lu ai.
