KIA Gasat zing da lu sai Shwe Myint Tin Byuha Dap Shara de Myen Hpyen Ni Bai Htim Gasat Wa Nna Majan Matut Byin Nga
Myen Hpyen Maga Nbungli Drone Bawm Laja Lana Wa Jahkrat Bun Nga
KIA htim gasat zing da lu sai Mungmyit mare na Shwe Myint Tin Byuha dap shara hpe Myen hpyen maga dai hpawt kaw na n-gun kaba hte bai htu gasat wa ai majaw, Majan laja lana matut byin taw ai rai nga ai.
Myen hpyen maga dai hpawt manap hkying 7 chyen ten daram kaw nna, Y12 Nbungli, Jet nbungli ni hte bawm sa jahkrat bun ai hpang, lagaw dap hte bai htu lung wa ai majaw, majan laja lana gap gasat hkat wa ai lam shawng lam hpyen magam gun hte ni nawn ai Salang langai KNG shiga de n dai zawn tsun dan wa ai re.
“Mani gaw anhte maga na sa htim gasat ai majaw, Shwe Myint Tin Byuha dap shara hpe gasat zing la lu wa ai, an hte maga gasat zing la lu ai dap hpe bai lu na matu Myen hpyen ni dai hpawt hkying 8 pyi rai n htu lu shi ai kaw na nbungli hte bawm bai wa jahkrat hpang wa ai, dai hpawt manap laman hta sha nbungli hpan lahkawng hte 3 lang da bat wa jahkrat kau da ai, dai na n sin sin wa ten du hkra anhte maga a tsawm sha naw lu ninghkap gasat taw nga ai,” nga tsun dan ai re.
Shwe Myint Tin Byuha dap shara gaw, Mungmyit hte Mandung lam lapran kaw nga ai dap shara rai nna, dai ginra na hpyen masa, ginra masa lam hta ahkyak dap shara langai re lam chye lu ai.
Dai dap shara hpe Dingda ginwang ginjaw kata na Dung 34 na KIA hte pawng hpawm dap ni September 28 ya shani htim gasat zing madu kau wa ai rai nga ai.
Mungmyit mare makau na dap shara nkau hpe htim gasat zing madu kau ngut ai hpang, KIA hte pawng hpawm ni Mungmyit mare hpe matut htim gasat nga ai gaw, dai na maga de du hkra rai yang, Mungmyit mare kaba makau na mahkrai kaw du hkra htu shadut htim gasat baw da lu sai lam, ginra mung shawa ni tsun dan ai re.
Mani gasat zing madu la lu ai shara kaw na laknak machyu pala a law alam hte Myen hpyen moi mang 5 hpe zing la lu ai lam, shawng lam hpyen magam gun hte ni nawn ai ni tsun ai re.
Myen hpyen maga Manmaw de htu na matu Mungmyit Mabeing ginra ni de hpyen n-gun kaba sa tawn ai lam hpe KIA hte pawng hpawm ni htim gasat taw ai lam mung rai nga ai.
