Shwegu mare sinna hkran, YayLae hte Sintat mare hpe wan nat jahten kau da ai Myen hpyen hpung hpe KIA KPDF dap ni bawm hte hkap shing la gasat ai hta, yawm htum marai 4 si hkrum wa ai lam, Shwegu PDF dap ni tsun ai re.
Dai Myen hpyen dap ni gaw, dapnu 88 kata na hpyen n gun 100 jan lawm ai hpyen hpung ni rai nna, Sintat mare kaw na, Tingbaw Inn mare de yu wa ai lam hta KIA Dung 5 hte KPDF dap pawng hpawm hpung ni hkap shingla gasat dat ai hta, sum machyi lam law wa ai nga, KPDF na lit nga ai ni KNG shiga dap de tsun dan ai re.
“Jahpawt hkying 5 daram kaw na hkying 8 ten du hkra byin ai. shan hte maga sum machyi lam loi nga ai. ya gaw bai hting nut mat na, Na Pawng maga de bai hting nut mat ai.” nga tsun dan ai re.
September praw 21 ya jahpawt hkying 5 kaw na hkying 8 daram aten du hkra, gap gasat hkat wa ai rai nna, KIA hte PDF dap maga de si hkala ai lam n nga ai sha a tsawm bai htingnut mat wa lu na, Myen hpyen dap ni hkap gap hkrum ai re majaw, yawm htum marai 3 si ai lam tsun ai re.
Ya ten Shwegu sinna hkran maga de Myen hpyen n gun 100 jan hte hpyen man 2 garan nna, htu shadut hkawm nga ai rai nna, mung mare masha nta ni hpe nat jahten ai lam ni galaw taw nga ai lam chye lu ai.
