Laiza makau, Namsan hpyen man de Myen hpyen dap gaw n dai laman nbungli hte laja lana wa htim gap gasat taw nga ai lam chye lu ai.
September 16 ya shani lani mi hta nbung li hte 10 lang jan wa gap bun nna, laban shani hta mung 8 lang wa gap bun kau da ai lam, shawng lam magam gun langai KNG de n dai zawn tsun dan ai re.
“September 16 ya shani gaw, numdaw 4 lang wa gap ai, dai shani laja dik re, hkying 9 ram hta Jet nbung li 2 hte numdaw 2 lang gap bun kau da ai. dai hpang, hkying 12 ram hta kalang, shana maga de gaw Jet hkrai sha 3 hte bai sa gap bun numdaw 2 lang re. jan du du hkra gap ai ga rai nga ai, anhte mung kaduk na pyi n le.” Nga tsun dan ai re.
Dai hpang shani hta mung n bungli hte numdaw 4 lang sa matut gap bun ai re. Dai nbungli ni gaw, Myitkyina hte Mandalay Tadaoo kaw nna sa wa ai n bungli re lam chye lu ai.
September 16 ya jahpawt, Myen hpyen dap Lailum Post hpe sa htim gap gasat kau ya ai hpang, ya na zawn n bungli hte laja lana wa gap bun ai re nga, Dukaba Nhpang Naw Bu ndai zawn matut tsun dan ai re.
“Ndai laman tsawm ra laja lana wa gap taw nga ai. anhte zing kau ya dap shara makau hte Namsan dai shara ni hkan wa gap ai ga rai nga ai” nga tsun dan ai re.
Lailum Awng Ja post gaw, Myitkyina Manmaw lam Namsan Yang mare makau hpyen masa lam hta ahkyak dik post re lam, Dukaba Naw Bu matut tsun ai re.
Dai shara hta lai wa sai 1994 ning Myen hpyen dap hte KIA dap simsa lam la ai ten kaw na, Myen hpyen dap ni dung ai rai nna, n dai daru magam zing ai hpang, dai makau grup yin hta KIA dap ni shamu shamawt wa ai hpang, ya na zawn htim gasat zing kau lu ai re lam chye lu ai.
Ya byin nga ai majan gaw, lai wa sai 2011 ning hkan na majan hte n bung ai rai nna, n dai kalang na majan hta laknak kaba hte Drone hpe madung n gun shadat nna, gap gasat hkat taw ai majan re lam Dukaba Naw Bu tsun ai re.
Ndai ten Myen hpyen dap hte KIA dap lapran majan matut laja taw nga ai rai nna, mung shawa ni mung hpyen masa shiga hpe madat let, sadi maja na nga na lam, KIO kaw na sadi jaw n dau da ai re.
