Sinli Bum hta dung ai Balawng TNLA dap ni hpe Myen hpyendap gaw n gun kaba hte htim gasat na hkyen nga ai lam chye lu ai.
Dai shara hta kani shadu ai jak rung hpe sin nga ai Balawng dap ni hpe, Myen hpyen dap n gun kaba hte htu shadut htim gasat na hkyen shajin taw nga ai lam, dai ginra na mung mare masha langai KNG shiga dap hpe ndai zawn tsun dan ai re.
“Myen ni n dai lapran Jelan bum n dai Balawng TNLA hte tat pawng tsu hpung ni n dai de kani di shadu ai le i? dai makawp maga ai ni hte Myen hpyen hpung ni shaja hkat taw ai rai nga ai. Myen hpyen dap ni gaw n dai 25 ya rai n du shi ai laman zing na ngu ai nga, ya hpyen n gun ni grai jat wa ai ga rai nga ai.” nga tsun dan ai re.
Sinli bum hta TNLA dap ni kani shadu taw ai lam ginra masha ni tsun ai raitim, KNG hku nna laksan shateng lu ai lam n nga ai re.
Lai wa sai shaning hta, Balawng TNLA ni a kani shadu arung arai htaw da ai mawdaw kaba langai hpe KIA Dung 9 ni hkap lu rim nna, dai kani shadu ai kaw lang ai arung arai ni hpe hkap jahten kau ya ai mabyin lam ni nga wa ai re.
September 17 ya shani kaw na Muse makau Nam Gat mare makau ni hta, Myen hpyen dap, Pyi Thu Tsit ni pawng hpawm nna TNLA dap hte laja lana gap gasat hkat wa ai lam chye lu ai.
Dai gap hkat ai shara hta, 105 Mile Myen hpyen dap kaw na laknak kaba ni hte ding yang gap bun taw nga ai lam chye lu ai.
Ya ten Nam Gat, Man Kang, Mai sat mare na mung mare masha 200 daram gaw, Nam Hkam mare kaba hta sa du hprawng yen taw nga nna, dai ni a matu malu masha garum ningtum lam ni ra ahkyak taw ai lam chye lu ai.
Myen hpyen dap ni ya ten, dai ginra makau grup yin hta hpyen n gun kaba hte htu shadut taw nga nna, Majan kaba byin wa na masa nga ai lam ginra masha ni tsun maram da ai re.
