Laiza hte yep, Miwa hkran Nabang mare hta, hpyen nbungli du wa yang gara hku sadi maja na ngu ai sadi jaw n sen shawu da ai hpe na lu ai majaw, Laiza ginra masha ni myit tsang taw nga ai lam chye lu ai.
September 18 ya jahpawt hkying 8 daram aten hta ngoi wa ai rai nna, shawoi kalang mung nna yu ai n sen re lam, Laiza hta nga ai mung shawa langai KNG shiga dap de tsun dan ai re.
“Ndai kaw nga ai na sai, kalang mung n na yu ai, chye ai manang ni hpe bai hkan sa sagawn yang, hpyen n bungli du wa yang, sadi maja ra na n sen re, nga tsun dan ai, dai majaw anhte mung shawa ni gaw hkrit tsang nga ga ai.” nga tsun dan ai re.
Ndai zawn sadi jaw ai n sen hte seng na KIO ginjaw shiga dap lit hkam Dukaba Nhpang Naw Bu hpe san yu yang shi n dai zawn tsun dan ai re.
“Dai hpawt hkying 8 jan ram aten hta ngoi wa ai, Hpyen Nbung li sa ai shaloi alarm jaw ai (sadi jaw ai) n sen re, n dai shangoi ai gaw, Miwa Na Bang hta sha shangoi ai n re sha, Miwa mungdan ting shangoi ai re nga tsun ai, moi Japan ni Miwa mung de shang ai n htoi ten hpe masat hku na shaning shagu shangoi ai re nga shiga dai hku lu da ai le” nga tsun dan ai re.
Ndai nsen hpe Miwa mungdan mare kaba ni hta gaw, shaning shagu shangoi ai rai tim, Laiza Na Bang mare hta gaw n dai shawng ning nan lang na ga ai n sen rai nna, ya ten byin nga ai majan masa hte matut ai lam nga n nga re hpe gaw n chye lu ai lam Dukaba Naw Bu matut tsun ai re.
Ndai ten Myen hpyen dap hte KIA dap lapran majan laja lana gap gasat taw nga ai rai nna, Laiza ginjaw ginra makau grup yin hta n bungli hte laja lana wa htim gap gasat taw ai ten mung re lam chye lu ai.
