Indaw ginra, Mawtik mare na mung shawa ni a dum nta gap na matu htaw gahkyin da ai hpun pyen ni hpe Myen hpyen dap ni lagu dut sha taw nga ai lam, ginra masha ni kaw na chye lu ai.
Mawtik mare hta hpyen n-gun 70 daram hta lai wa sai May shata kaw nna wa du dap jung nga ai Myen hpyendap gaw, dai mare na hpyen yen mat ai mung mare masha ni a dum nta arung arai hte, hpun pyen ni hpe lagu dut sha taw nga ai nga, dai ginra na mung shawa langai KNG shiga dap de tsun dan ai re.
“lai wa sai ten kaw na lagu htaw dut sha nga ai re, ya n dai kalang hte rai yang mawdaw kaba 6 rai sai, anhte mu ai leng 12 lawm ai, mawdaw kaba ni hkrai re. Indaw kaw wa htaw dut ma ai.” nga tsun dan ai re.
Madung dai ginra hta nga ai Pyosaw hti hte Myen hpyen dap ni pawng let lagu la taw ai rai nna, dai lagu htaw pru wa ai hpun pyen ni hpe Indaw muklum hta wa htaw dut taw nga ai re lam chye lu ai.
Dai Myen hpyen dap hte Pyosawhti ni gaw, hpun pyen lagu dut ai sha n ga, manu dan ai arung arai ni hpe mung lagu la taw nga ai lam chye lu ai
Jinghpaw mung hte Sagaing jarit, Indaw Bamauk lam, Mawtik ginra hpe Myen hpyen dap ni up madu lu na matu, dai ning kaw na hpyen n gun kaba hte htu shadut shang wa nna, ya ten Nanthar hte Mawtik mare hta dap jung nga ai majaw, dai ginra na mare kahtawng 10 jan, nam de hprawng yen taw nga ai lam chye lu ai.