Mandalay kaw nna hpyen arung arai hte malu masha htaw ai Myen hpyen hka sanghpawli 6 gaw, Mali hka lam hku nna, Jinghpaw mung maga de bai lung wa taw nga ai gaw, September 13 ya shani Hti Chyaik hta du sai lam chye lu ai.
Dai sanghpaw kaba 6 gaw, September praw 10 ya jahpawt Mandalay kaw nna, Jinghpaw mung de Mali hka lam hku lung wa taw ai rai nna, hpyen n-gun 100 daram hte hpyen arung arai ni lawm ai lam, Wetlet Informational Network lit nga ai Salang langai KNG shiga dap de tsun dan ai re.
“September praw 10 ya jahpawt jau dik na pru wa ai, ya hte sha wa htaw sa kau da nna, ya kalang bai lung wa ai rai nga ai, yu wa ai shata mi pyi nrai shi ai. n dai kalang mung hpyen n gun 100 daram lawm ai.” nga tsun ai re.
Myen hpyen dap maga, lai wa sai July shata hta mung Mandalay kaw nna Manmaw de hpyen hka sanghpaw li 9 hta hpyen n gun 300 daram hte laknak malu masha wa htaw sa kau da ai re.
Dai hka sanghpaw li 9 rai wa htaw sa kau da nna, bai n htang yu wa ai nhtoi 10 ya daram na ai hte, ya kalang bai lung wa ai re lam chye lu ai.
Ya ten Mali hka kaba taw ai ten re majaw, dai hka sanghpaw li hpung ni hpe hkap gap na matu yak hkak taw nga ai re lam rawt malan hpung ni maga tsun ai re.
Ya lung wa taw nga ai Hka sanghpaw li 6 gaw, dai ni September 13 ya shai Hti Chyaik hta du sai lam chye lu ai.
Lai wa sai shata hta lung wa ai Myen hpyen hka sanghpaw li 9 hpe KIA hte ginra daju PDF dap ni lam lapran hta jahkring hkring hkap gap gasat ai hta, Myen hpyen dap maga sum machyi ai lam law wa ai hpe chye lu ai re.
