Hpakant, Hawng Pa mare majan hta mung mare masha marai 10 daram hpe Myen hpyendap rim woi mat ai lam, ginra masha ni kaw nna chye lu ai.
September 11 ya jahpawt hkying 5 daram aten, Tamahkan mare hta dap jung nga ai Myen hpyen dap ni gaw Hawng Pa mare de KIA PDF dap ni nga ai lam shiga na ai majaw, laknak kaba gap bun let htu shadut lung wa ai kaw, lahkawng maga hkying hkum mi daram gap gasat hkat wa ai nga, dai ginra na amyu shayi langai KNG shiga dap de tsun dan ai re.
“Shanhte dai mare kaw KIA PDF ni nga ai lam shiga na kau ai ga rai nga ai, dai majaw dai hpawt jau hkying 5 daram aten kaw na laknak kaba gap bun let, lung wa ma ai, ndai KIA maga de na ni mung bai gap rai yang gaw, lahkawng maga hkying hkum mi daram gap hkat wa ai ga rai nga ai.” nga tsun dan ai re.
Dai Myen hpyen hpung ni gaw, lai wa sai September praw 8 ya shani du shang wa ai Myen hpyen n gun 80 daram lawm ai hpyen hpung ni rai nna, dai hpawt Hawng Pa mare de hpyen n gun 50 daram lang nna, htu shadut gap gasat wa ai re lam chye lu ai.
Dai Myen hpyen dap ni htu shadut lung wa ai hpe, KIA PDF dap maga bai hkap shingla gasat ai majaw, lam lapran kaw na, mung shawa marai 10 daram hpe rim woi let bai hting nut mat ai re lam ginra masha langai n dai zawn matut tsun dan ai.
“ya gaw sinat n sen bai n na mat sai, bai hting nut mat ma ai, mung shawa marai 10 daram hpe hpyen ninggang shatai na matu rim woi lang nna, bai hting nut mat ma ai. maw ginra re nga yang gaw gara kaw na gadai ni hpe rim woi mat ai ngu a tsawm tup hkrak n chye ai.” nga KNG de tsun dan ai re.
Myen hpyen dap maga laknak kaba 10 lang jan gap bun ai majaw, Hawng Pa mare na hpungkyi jawng shat sha shara hta wa hkrat ai majaw, dai shat sha shara na hpri pa ni malawng hten mat ai lam nga ai hpe chye lu ai.
Ya ten dai ginra na mung mare masha ni, tinang man ang ai shara ni de hprawng yen hkawm taw nga ai lam chye lu ai.
