Hpyen n’gun yawm wa sai Myen hpyendap gaw, shi a n’gun bai ban lu hkra, Pyihtusit ni hpe shaw jai lang ra wa ai masa de du taw ai lam KIO ginjaw shiga lit hkam Du kaba Nhpang Naw Bu tsun ai re.
August praw kaw nna, Jinghpaw mung hkan na Pyitutsit ni hpe sha n ga, Mungmyit Sinli ginra de na Pyithutsit ni hpe mung, n gun hpyi gahkyin nna, jinghpaw mung de hpyen n gun sa shakut nga ai lam, Du kaba Naw Bu KNG hpe n dai zawn tsun ai re.
“Pyithutsit ni hpe, Mungmyit Sinli ga de hpyen training jaw ai na sai, shata lahkawng hkawt rai sai, Muse kaw jaw ai, Namhpakka kaw jaw ai, Tamonye kaw jaw ai, dai ni hpe sinat kaba wunkat du hkra jaw ai rai nga ai, ya dai ni hpe Mandalay maga de htaw la na, Mandalay kaw na she Manmaw de n bungli hte sa ai, n kau Myitkyina de sa ai nga shiga lu la ai. ya shaga ai Pyithutsit hpung ni gaw, Miwa hte Sam wuhpung kaba ai hkan na Pyithutsit ni re lam chye lu ai.” nga tsun dan ai re.
Myen hpyendap gaw ya ten, Jinghpaw mung de hka lam, n bung lam, kawng lam, lam magup hku na, n gun jat taw ai lam matut chye lu ai.
Dai hta August praw kaw nna gaw, Jinghpaw mung, Putao hte Waimaw ginra hkan na, Pyithutsit hpyenla dingsa ni hpe kalang bai hkan gahkyin la nna, shawng lam de sa taw nga ai lam ginra masha ni tsun ai re.
Mungmyit Sinli ginra de majan byin shagu Pyithutsit ni kaw na hpyen n gun garum hpyi ai lam ni ding yang nga wa ai rai tim, n dai laman gaw grau laklai nna, hpyen shamu shamawt nga ai re lam, Muse ginra masha langai KNG de n dai zawn matut tsun dan ai re.
“Anhte ndai Muse hkan hpaw da ai Pyithutsit wuhpung gaw grai law ai le i, Myoma pyihtutsit, Panse Pyithutsit, Lunghtang Pyithutsit nga ni laga grai naw law ai, rai tim law malawng gaw, n gun kaba ai Pyithutsit ni hpe n gun hpyi ai ga rai nga ai, grau dan dawng wa ai gaw ndai shata praw kaw na rai nga ai, shawoi hkan mung gaw hpyi ai, rai tim n dai lang na gaw hpyen shamu shamawt ai lam ni grau dan dawng wa ai, majan n byin tim grai shamu shamawt nga ma ai.” nga tsun dan ai re.
Lahta sammung, Mungmyit Sinli ginra hta Pyithuit wuhpung 50 jan nga ai kaw nna, n – gun ja ai Miwa, Sam pyithutsit ni kaw na n gun hpyi shaw gahkyin ai rai nna, Kawnghka, Mungbaw Pyithutsit ni kaw na gaw hpyi ai lam n nga ai re hpe chye lu ai.
Laiwa sai July htum maga kaw nna, Mandalay- Lashio de N gun jat shamu shamawt lung wa ai Myen hpyen hpung ni gaw, ya ten Kuthkai hte Namhpakka- Muse- Namhkam dai lam dingyang shara la lai lung, shamu shamawt nga dingyang re hpe chye lu ai.
Myen hpyendap gaw, KIO ginjaw ginra makau grup yin de, hpyen n gun htu shadut let, majan baw lu na matu, Mandalay de na – Shwigu – Manmaw hka lam hku hpyen n gun the arung arai htaw shalai nga ai zawn, lahta Sammung, Mungmyit Sinli maga de na mung, Jinghpaw mung maga de, kawng lam, Nbung lam magup hku, n gun htaw shalai ai lam, dingyang nga ai nga ginra masha ni tsun dan ai re.
Mungmyit Sinli maga de na, Jinghpaw mung de hpyen n gun sa shakut nga ai myen hpyendap hpe lai wa sai July shata mi tup Kuthkai the Namhpakka- Muse lapran, kaw KIA hte TNLA dap ni lam lapran hkap shingla gasat nna, majan laja lana byin lai wa sai re.
dai zawn myen hpyendap hpyen hpung ni hkap shingla gap gasat hkrum shagu, myen hpyendap maga si hkala hkrat sum ai law ai majaw, n gun kya wa nna, ya na zawn Pyihtusit ni hpe bai jai lang wa ra ai masa re lam mung masa masam maram ai mung shawa ni tsun nga ma ai re.
