Myen hpyendap du shang wa ai majaw, Hpakant lam, Namya hte Namting mare lapran mare kahtawng 7 na mung mare masha ni ya ten tinang man ang ai mare buga kaba de, hprawng yen taw nga ai lam chye lu ai.
August 22 ya jahpawt Kamaing kaw na pru wa ai Myen hpung ni gaw, Namya mare lahta Senghpra Gatnoi maga de hpyen shamu shamawt lung wa sana ngu ai shiga majaw, dai ginra na mung mare masha ni tau hkrau hprawng yen taw ai masa re lam, dai ginra na mung shawa langai KNG de ya na zawn tsun dan da ai re.
“Mare masha law malawng gaw hprawng yen ma sai ga rai nga ai, n ta sin na matu n ta langai na langai lahkawng ram sha nga taw sai. Hpakant de yen ai ni yen, law malawng gaw Sabaw maw de yen ai law ai ga rai nga ai, Namya Myitkyina zawn re de yen ai ni mung nga ai le, madung gaw Myen hpyen dap ni lung wa sai nga majaw, majan byin na hpe tsang na tau hkrau yen ai ga rai nga ai” nga tsun dan ai re.
Ya hprawng yen taw nga ai mare kahtawng ni gaw, Kapmaw, Senghpra, Hkumtsai Zup, Hkrairun, Gat Noi, Gawlu Yang mare kahtawng ni re lam chye lu ai.
Dai Myen hpyen hpung ni gaw, lai wa sai August 17 ya shani Mogaung na lung wa ai Myen hpyen hpung ni rai nna, Dumbung kaw na Kamaing de rai wa ai lam hta Dumbung mare na mung shawa 5 hpe hpyen ninggan shatai woi hkawm ngut ai hpang, Kamaing kaw na Namya de bai lung wa ai ten hta mung Kamaing mare na mung shawa marai 5 hpe hpyen ninggang hku bai rim woi lung wa ai hta hkap shingla gasat hkrum ai re.
Hkap gasat hkrum ai mabyin hta Myen hpyen dap maga marai 9 si nna, marai 13 hkala hkrum wa ai hte,, ya ten dai Myen hpyen dap ni Namya mare hta matut rawng nga ai lam ginra masha ni kaw na chye lu ai.
Ya ten Namya mare hta du nga ai Myen hpyen hpung ni Hpakant maga de matut shamu shamawt lung wa na hkyen ai majaw, KIA dap maga na Nlung dup hte Gawlu Yang mare shara lahkawng hta lam pat da ai majaw, hkrun lam hkawm mung shawa ni hte Mawdaw 200 daram Namya mare hta chyat rawng nga ai lam matut chye lu ai.
Ya ten dai ginra de htu shadut taw nga ai Myen hpyen dap ni gaw, Mung mare masha ni hpe hpyen ninggang shatai ai lam hte hkrun lam baw n baw sengke hte mung mare masha ni hpe wa lagu yu shangun ai lam ni mung nga taw ai hpe chye lu ai.
Ya ten dai ginra hta Myen hpyen dap hte KIA dap lahkawng maga hpyen masa shaja hkat taw nga nna, lai wa sai August 22 ya shani Myen hpyen dap ni gap dat ai laknak kaba si a majaw, amyu shayi langai hkala sawng wa ai re.
